Ikki qavatli poyezdlar Moskvani shahar aeroportlari bilan bog‘laydi
Moskvada “Aeroekspress” uchun mo‘ljallangan va Shveytsariyaning Stadler kompaniyasi tomonidan ishlab chiqarilgan ikki qavatli “ESh2” poyezdlari sinovdan o‘tkazilmoqda. Bu haqda “Russos.livejournal.com” xabar bermoqda.
Poyezdlar Moskvaning har uchala aeroporti — “Domodedovo”, “Sheremetyevo” va “Vnukovo”ga qatnashi kutilmoqda, biroq bu poyezdlardan dastlab faqat “Domodedovo” yo‘nalishida foydalaniladi.
Poyezdlar ikki xil – olti va to‘rt vagonli konfiguratsiyada yetkazib beriladi. E’tiborli tomoni, ularni bir-biriga qo‘shib, sakkiz, 10 va 12 vagonli uzun harakatlanuvchi tarkiblarni shakllantirish mumkin.
Taxminlarga ko‘ra, “Vnukovo” yo‘nalishida olti vagonli, “Sheremetyevo”ga sakkiz vagonli, “Domodedovo”ga esa 10 vagonli ikki qavatli poyezdlar qatnashi kutilmoqda.
Dastlabki kelishuvga ko‘ra, “Aeroekspress” bunday poyezdlarning 25 tasini sotib olishni rejalashtirgan edi, biroq rubl kursining qadrsizlanishi natijasida vaziyat hozircha noaniq bo‘lib turibdi. Xususan, Stadler “Aeroekspress” uchun tayyorlagan dastlabki to‘rtta poyezdni Ozarbayjonga sotib yubordi.
