Nyu-Yorkda 4-iyul kuni bo‘lib o‘tgan xot-dogni tez yeyish bo‘yicha chempionatda yangi g‘olib aniqlandi. CNN xabariga ko‘ra, musobaqaning yangi g‘olibiga aylangan 23 yoshli Mettyu Stouni belgilangan 10 daqiqa ichida 62 ta xot-dogni paqqos tushirdi.
Stouni shohsupada Joy Chestnatning o‘rnini egalladi – Chestnat so‘nggi sakkiz yildan beri birinchilikni hech kimga bermay kelayotgandi. Bu yilgi musobaqada Chestnat 60 ta xot-dog ko‘rsatkichi bilan ikkinchi o‘rinni egalladi.
O‘tgan yili Stouni 56 ta xot-dogni tanovul qilib, ikkinchi bo‘lgandi. Bu yil esa o‘z natijasini oltitaga yaxshiladi. “Buning uchun mashq qildim. G‘alabaga ishonchim komil edi, deb ayta olmayman, biroq musobaqaga tayyor edim”, - dedi g‘olib.
Shunga qaramay, Chestnat tomonidan 2013-yilda o‘rnatilgan rekord daxlsiz qoldi – o‘shanda u 10 daqiqa ichida 69 xot-dogni yeb qo‘ygandi.
Ayollar o‘rtasidagi bahslarda ketma-ket ikkinchi yil Miki Sudo g‘olib chiqdi. Bu safar Miki 10 daqiqa ichida 38 ta xot-dogni tanovul qildi, vaholanki, o‘tgan yili g‘olib chiqish uchun 34 ta yegulik yetarli bo‘lgandi. Musobaqada ikkinchi bo‘lgan Sonya Tomas esa o‘z vaqtida 45 ta xot-dogni yeb, musobaqa rekordini o‘rnatgan.
Xot-dogni tez yeyish bo‘yicha erkaklar o‘rtasidagi musobaqalar Nyu-Yorkda 1972-yildan beri har yili o‘tkazib kelinadi. 2011-yildan ayollar o‘rtasidagi musobaqalar ham o‘tkazila boshlandi. AQSHning boshqa shaharlarida ham shunday musobaqalar tashkil etiladi.
Izoh (0)