Filippinda cho‘kib ketgan parom qurbonlari soni 61 kishiga yetdi
Filippinda 2-iyul, payshanba kuni cho‘kib ketgan parom qurbonlari soni 61 kishiga yetdi. Bu haqda “Kommersant.ru” xabar bermoqda.
Dastlabki taxminlarga ko‘ra, kema halokatiga noqulay ob-havo sharoiti sabab bo‘lgan. Biroq Filippin matbuotining qayd etishicha, kemadagi yuk miqdori belgilanganidan ortib ketgan — unda, yo‘lovchilardan tashqari, guruch va sement to‘la qoplar ham bo‘lgan.
Davlat rahbarining rasmiy vakili Abigayl Valtening ma’lum qilishicha, Filippin prezidenti Benigno Akino sohil qo‘riqlash xizmatiga bedarak yo‘qolganlarni topish uchun barcha choralarni ishga solish haqida ko‘rsatma bergan.
Biroq, “Qizil Xoch”ning Filippin bo‘limi boshlig‘i Richard Gordonning ma’lum qilishicha, noqulay ob-havo sharoiti keng miqyosli qidiruv-qutqaruv ishlarini olib borishga imkon bermayapti.
Halokatga uchragan Kim Nirvana paromi Ormok shahridan Pilar portiga yo‘l olgandi. Uning bortida 187 kishi bo‘lgani aytilmoqda.
