Gollandiyada 12 yoshdan kichik bolalarga evtanaziyani qo‘llashga ruxsat berishni taklif qilishdi

Gollandiya bolalar tibbiyoti uyushmasi og‘ir darddan qiynalayotgan va sog‘ayib ketishga imkoniyati bo‘lmagan bolalar, ularning yoshidan qat’iy nazar evtanaziyaga haqli bo‘lishi kerak, degan taklif bilan chiqdi. Bu haqda “Korrespondent.net” De Volkskrant gazetasi ma’lumotiga tayanib xabar beradi.

Hozirgi paytda evtanaziya uchun yosh cheklovi 12 yoshni tashkil etadi. “Bu cheklov olib tashlanishi kerak. Har bir alohida holatda bolaning aqli rasoligi va o‘z harakatlari uchun javob bera olishidan kelib chiqib qaror qabul qilish kerak”, — deb hisoblaydi shifokorlar.

“Yosh bo‘yicha cheklov muammolarni keltirib chiqaradi. Bizdagi tizim evtanaziyani faqat yangi tug‘ilgan go‘daklar hamda 12 yosh va undan katta bolalarga nisbatan qo‘llashga ruxsat beradi. Biroq bolalar ancha erta yoshida ham o‘z harakatlari nimaga olib kelishini yaxshi tushunadi”, — deydi tashkilot vakili, professor Eduard Verxagen.