Bugun, 16-iyun kuni JCh—2018 ikkinchi saralash bosqichining 2-turi doirasida Pxenyanda KXDR va O‘zbekiston terma jamoalari o‘rtasida o‘yin bo‘lib o‘tadi. O‘zbekiston milliy teleradiokompaniyasining “Sport” telekanali ushbu uchrashuvni namoyish qilishi mumkin.
O‘yin Toshkent vaqti bilan 13:00 da boshlanadi. “Sport” telekanali “Daryo” nashriga ma’lum qilishicha, o‘yinni faqatgina Shimoliy Koreya kanallaridan biri efirga uzatadi. Agar “Sport” telekanali KXDR kanali to‘lqinini ilishning uddasidan chiqsa, bahs albatta jonli efirda namoyish qilinadi. Aks holda, uchrashuv keyinroq yozib olingan holatda uzatilishi mumkin.
O‘zbekiston milliy teleradiokompaniyasining rasmiy saytida 12:50 dan boshlab JCh—2018 saralash o‘yinlaridan biri namoyish qilinishi ko‘rsatilgan. Ammo bu aynan qaysi uchrashuv bo‘lishi ko‘rsatilmagan. KXDR televideniyesi kanali to‘lqinlarini ilishning imkoni bo‘lmasa, 12:50 dan boshlab “Sport” kanali JCh—2018 ikkinchi saralash bosqichi 1-turidagi Yaman – KXDR uchrashuvini namoyish qiladi.
JCh—2014 saralash bosqichida ham O‘zbekiston va Shimoliy Koreya bir guruhga tushgandi. 2011-yil 11-oktabrda O‘zbekistonning 1:0 hisobidagi g‘alabasi bilan yakunlangan bellashuvni ham jonli efirga uzatishning imkoni bo‘lmagan.
Izoh (0)