Samarqand viloyatining Urgut tumanida investitsiya dasturi asosida barpo etilgan tug‘ruq majmuasi va ko‘p tarmoqli markaziy poliklinika binolari foydalanishga topshirildi, deb xabar bermoqda O‘zA.
Shu munosabat bilan o‘tkazilgan tadbirda Prezidentimiz rahnamoligida sog‘liqni saqlash tizimini isloh qilish jarayonida tibbiyot muassasalari moddiy-texnik bazasini mustahkamlash, aholiga ko‘rsatilayotgan xizmat sifati va samaradorligini yanada oshirishga alohida e’tibor qaratilayotgani ta’kidlandi.
Xususan, 2012—2014-yillarda Samarqand viloyatida o‘nga yaqin tuman tibbiyot birlashmasini modernizatsiya qilish ishlari amalga oshirildi. Muassasalarda 68 milliard 300 million so‘mlik qurilish va rekonstruksiya ishlari bajarildi.
Urgut tumani tibbiyot birlashmasining 100 o‘rinli tug‘ruq majmuasi va 150 qatnovga mo‘ljallangan ko‘p tarmoqli markaziy poliklinikasi qurilishi ham modernizatsiya ishlari samarasi bo‘ldi.
– Mazkur tibbiyot muassasalarida “Bunyodkor” mas’uliyati cheklangan jamiyati quruvchilari tomonidan 4 milliard 100 million so‘mlik qurilish-rekonstruksiya ishlari amalga oshirildi, – deydi Urgut tumani tibbiyot birlashmasi boshlig‘i o‘rinbosari Xayrulla Qayumov. – Shuningdek, 508 million so‘mlik qattiq va yumshoq jihozlar keltirildi. “Salomatlik-3” loyihasi asosida zamonaviy tashxis uskunalari o‘rnatildi.Bularning barchasi xalqimizga zamonaviy va yuqori sifatli tibbiy xizmat ko‘rsatish imkonini beradi.
Tuman tibbiyot birlashmasini modernizatsiya qilish doirasida joriy yilda terapiya, xirurgiya, tez tibbiy yordam hamda bolalar bo‘limlarini rekonstruksiya qilish ishlari davom ettirilmoqda. 2016-yilda esa birlashmaning Jartepa bo‘limi hamda yuqumli kasalliklar bo‘limini zamon talablariga moslashtirish rejalashtirilgan.
Izoh (0)