Gollivud kinoyulduzi, BMTning ezgu niyat elchisi hisoblangan Anjelina Joli Afrika mamlakatlari yetakchilarini ayollarga nisbatan zo‘ravonlikka qarshi kurashga chaqirdi. Bu haqda “TASS” xabar bermoqda.
“Ayollarga qarshi jinoyatlar uchun, ayniqsa, nizoli hududlarda jazoning amalda yo‘qligi qurollangan guruhlar zo‘ravonlikni qurol sifatida yanada kengroq qo‘llayotganliklarini bildiradi”, - dedi Joli Afrika Ittifoqining navbatdagi sammiti arafasida.
Aktrisaning so‘zlariga ko‘ra, urushlar sabab 50 million aholi o‘z uylarini tashlab chiqishga majbur va ularning yarmini ayollar va bolalar tashkil etadi. Zo‘ravonlik butun dunyoda mavjud, biroq Afrika ayollari bundan nisbatan ko‘p jabr chekishmoqda.
“Zo‘ravonlik qurboni bo‘layotgan ayollar va bolalar soni ortib bormoqda, o‘quvchi qizlarni esa jinsiy ehtiyojlar uchun qulga aylantirishmoqda. Turli mamlakatlar va butun dunyo iqtidorli avlodlarni yo‘qotmoqda”, - dedi Joli.
“Bularning bari nizolarni oldini olish va to‘xtatishga qodir emasligimiz bilan bevosita bog‘liq, bu hodisalar cheksiz-chegarasiz qayg‘u-alamlarga sabab bo‘lmoqda”, - deya qayd etdi ezgu niyat elchisi.
Izoh (0)