Qozog‘iston Ichki ishlar vazirligi kelinlarni o‘g‘irlanishi bilan bog‘liq videoroliklarni kuzatib bormoqda. Bu haqda, IIV rahbari Kalmuxanbet Qasimovning so‘zlariga asoslanib, Qozog‘iston parlamenti deputati Aygul Solovyeva Facebook’dagi sahifasida ma’lum qildi.
“Vazirning o‘zi bu videolarni shaxsan ko‘rganini ma’lum qildi. Internetdagi bu harakatlar besamar bo‘layotgani yo‘q. Vazirlikda bu kabi videolarni kuzatib borish uchun bir xodim mas’ul qilib belgilangan”, - deb yozdi deputat Facebook’dagi sahifasida.
IIV rahbarining ma’lum qilishicha, uning o‘zi kelinlarning olib qochilishi bilan bog‘liq beshta videoni ko‘rgan va ularning ba’zilari bo‘yicha tergov harakatlari boshlangan, boshqalari bo‘yicha esa jabrlanuvchilar da’volarini qaytarib olishgan.
So‘nggi vaqtlarda internetda qozog‘istonlik kelinlarni o‘g‘irlash holati tasvirlangan videoroliklar ko‘payib ketdi. Aksariyat videolar Janubiy Qozog‘iston viloyatida suratga olingan. Xususan, 10-iyun kuni Facebook foydalanuvchilaridan biri qizga kuch bilan ro‘mol kiydirishayotgani tasvirlangan videoni yukladi. Qiz bunga tinimsiz qarshilik ko‘rsatib, oxiri ahvoli og‘irlashib qolgan.
Bundan tashqari, may oyida Chimkentda kelin o‘g‘irlayotganlarning videosi internetga chiqarilgandi. Unda ikki erkak kelinni oq rangli mashinaga kuch bilan o‘tkazayotgani tasvirlangan.
Izoh (0)