O‘zbekiston va Eron terma jamoalar o‘rtasida kechgan o‘rtoqlik uchrashuvidan so‘ng Mirjalol Qosimov matbuot anjumanida ishtirok etdi, deb xabar beradi “Uff.uz”.
Eslatib o‘tamiz, uchrashuvda O‘zbekiston 0:1 hisobida Eronga imkoniyatni boy berib qo‘ydi.
- Assalom alaykum. Bunday natijani o‘zimiz ham kutmagan edik, — deb so‘zini boshladi Mirjalol Qosimov. — Ammo biz Shimoliy Koreyaga qarshi kechadigan o‘yinga tayyorlanmoqdamiz va bu uchrashuvdan oldin kamchiliklarni ko‘rib olmoqchi edik. Raqib juda kuchli, shu sababli ham u bilan o‘ynadik. O‘yin ilk daqiqalarda chiroyli boshlanmadi. Oxirgi daqiqalarda gol o‘tkazib yuborganimiz esa muxlislarni ranjitdi. Ammo bu uchrashuv tayyorgarlik sifatida qaraymiz. Agarda g‘alaba kerak bo‘lganida Odil Ahmedov va Vitaliy Denisov singari yetakchi futbolchilarni zaxiraga olmagan bo‘lardik. Biroq bizga KXDR bilan bo‘ladigan o‘yinga tayyorgarlik muhimroq.
- Ikrom Aliboyev haqida nima deya olasiz?- Ikromning ilk o‘yinida terma jamoa g‘alaba qozonishi va bu narsa yodida qolishini istagan edik. Ammo nasib qilmagan ekan. Ikromning to‘p bilan muomalasi, maydonni ko‘rishi, yakkakurashlarda qo‘rqmasligi va o‘zini tortmasligi qay darajada mahoratli ekanini ko‘rsatib turibdi. U kelajakda ham terma jamoaga ko‘p kerak bo‘ladi.
- O‘yin vaqtini sal kechroqqa belgilasak bo‘lmasmidi? Eron terma jamoasi bosh murabbiyining aytishicha, 18.00 da boshlangani ularga qo‘l kelgan ekan.- Bizning KXDR bilan o‘yinimiz esa soat 17.00 ga belgilangan. Shunday ekan, biz uchun ham o‘yin vaqti ertaroqqa belgilanishi juda kerak edi. Bu o‘yin bizga ko‘p narsa berdi.
- O‘yin tempi u qadar baland emas edi. Buning sababi nimada, issiqmi yoki to‘rt kundan keyin bo‘ladigan rasmiy uchrashuvga kuch saqladingizmi?- Eron ikkinchi raqam ostida o‘ynashga va qarshi hujumlardan foydalanishga intildi. Eronning safardagi o‘yinlari shunday uslubda o‘tadi. Shu sababli bir qator qiyinchiliklarga duch keldik. Ammo shunisi bilan ham o‘rtoqlik o‘yinlari kerak. Chunki rasmiy o‘yinda bundan qiyinroq bo‘lishi turgan gap.
- Sanjar Shoahmedov haqida nima deysiz? Yoshlar terma jamoasida hujum chizig‘i qiziqarliroq ko‘rinmoqda. O‘sha jamoadan hujumchilar chaqirsangiz bo‘lmaydimi?- Sanjar ham Ikrom Aliboyev singari o‘z jamoasida ajralib turibdi. Ammo gap shundaki, maydonga faqat 11 kishi tushadi. Shuningdek, zaxira imkoniyatlaridan foydalanish ham cheklangan. Shu sababli yangi futbolchilarni sinab ko‘rish imkonimiz kam. Aytaylik, Gadoyev ham yaxshi formada, ammo uni bugun maydonga tushira olmadik. Hammaning o‘z vaqti bor. Shuningdek, yoshlar terma jamoasidagi hujumchilar ham yaxshi o‘ynamoqda.
Ammo yoshlar va kattalar o‘rtasida farq katta. Ular avvalo olimpiya terma jamoasiga chaqirilib, mahoratini oshirishi kerak. Shundan so‘ng milliy terma jamoaga chaqirish mumkin. Ammo hozirgi yoshlar terma jamoasida yaxshi futbolchilar borligini ko‘rdik. Masalan, Doston Hamdamov. Biroq ularni chaqirishda shoshilmaslik kerak. Aytaylik, Temur Hakimovni juda erta yulduz qilib yubordik. Keyin esa shu “yulduz”ga o‘zimizning ham qo‘limiz yetmay qoldi.
- Siz qaysi kriteriya bo‘yicha hujumchilarni chaqirmoqdasiz, statistika bo‘yichami yoki o‘yiniga qarabmi? Masalan, Aleksandr Geynrix va Temurxo‘ja Abduholiqovning statistikasi ham yaxshi, ularni chaqirsangiz bo‘lmaydimi?- Abduholiqovning statistikasi juda ham yaxshi emas. Uning gollari ko‘p emas, shuning uchun ham chaqirmaganmiz. Tushunaman, u “Paxtakor”dan chiqqan, shuningdek, xorijda o‘ynaganda ham shuncha vaqt ichida o‘ntacha o‘yinda maydonga tushdi, shekilli. Yana ham aniq bilmadim. Men faqat oxiriga qadar kurashadigan futbolchilarni terma jamoaga chaqiraman. Hozir futbol o‘ynashni hamma o‘rganib olgan. Masalan, Filippin bugun Bahraynni mag‘lubiyatga uchratdi. Shunday ekan, bizga faqat oxiriga qadar kurashadigan futbolchilar kerak. Guruhdagi raqiblar jiddiy. Aytaylik, o‘sha Filippin safida ham bir qator kuchli futbolchilar bor.
- KXDR yopiq davlat hisoblanadi. Raqibni o‘rganish qanday kechmoqda?- KXDR terma jamoasiga qarshi kechadigan o‘yin oldidan nazorat o‘yinida raqib sifatida Eronni tanlaganimiz bejizga emas. Eron ham koreyaliklar singari jismonan baquvvat va kurashuvchan futbolchilarga ega. KXDR hujumchilari ham bosh bilan yaxshi o‘ynaydi va chuqurlashtirilgan hujum tashkil qilishga usta. Bizning maqsadimiz rasmiy o‘yinda g‘olib chiqish. Shuning uchun bu o‘yindan tayyorgarlik sifatida foydalandik.
Izoh (0)