Chirchiqda dzyudo bo‘yicha Uchqun Murodov xotirasiga bag‘ishlangan an’anaviy xalqaro turnir boshlandi

Chirchiq olimpiya zaxiralari kollejida Uchqun Murodov xotirasiga bag‘ishlanib XXI bor o‘tkazilayotgan xalqaro turnir boshlandi, deb xabar beradi O‘zbekiston Milliy olimpiya qo‘mitasi matbuot xizmati.

Mazkur musobaqada O‘zbekiston, Qozog‘iston va Tojikistondan kelgan jami 114 nafar o‘smirlar va kadetlar xalqaro turnir g‘olibligi uchun bellashadi. Ushbu musobaqa, shuningdek, 2018-yili Argentinada o‘tkaziladigan o‘smirlar olimpiada o‘yinlarining litsenziyalari uchun reyting ochkolar ham o‘ynaladi.

11-iyun kuni xalqaro turnirning dastlabki kunida o‘smirlar o‘rtasida 8 ta vaznda (4 vaznda o‘smirlar – 4 vaznda qizlar) musobaqalar o‘tkazildi.

Mazkur musobaqalarda O‘zbekiston sportchilari 8 ta oltin, 8 ta kumush va 8 ta bronza medaliga sazovor bo‘ldi. Ya’ni oltin va kumush medallarning barchasi O‘zbekiston terma jamoasi a’zolari tomonidan qo‘lga kiritildi.

Shu kuni qozog‘istonliklar uchta bronza medaliga sazovor bo‘lgan bo‘lsa, yana bitta bronza medali Tojikiston terma jamoasi vakiliga nasib etdi.