Yangi Zelandiyada davom etayotgan Yoshlar o‘rtasidagi Jahon chempionatida O‘zbekiston U-20 terma jamoasi guruhning so‘nggi uchrashuvida Fiji yoshlari ustidan yirik g‘alabaga erishib, kelasi bosqichga yo‘l olgani haqida xabar berib o‘tgandik.
“Uff.uz” yozishicha, o‘yindan keyin terma jamoa bosh murabbiyi Ravshan Haydarov o‘z fikrlari bilan o‘rtoqlashdi.
“Bu biz uchun so‘nggi imkoniyat edi. Birinchi bo‘limda gol kiritish uchun kam imkoniyatlarga ega bo‘ldik, ammo ikkinchi bo‘limda futbolchilarimiz taktik jihatdan professional ekanligimizni namoyish eta oldi. Birinchi g‘alabamizga erishganimizdan xursandmiz. Umid qilamanki, bu mazkur Jahon chempionatidagi so‘nggi g‘alabamiz bo‘lmaydi.
Bugun taktik jihatdan juda yaxshi o‘yin o‘tkazdik. Kelasi bosqichdagi raqibimiz Avstriya juda kuchli terma jamoa ekanini bilamiz. Ular Gana, Argentina va Panama kabi terma jamoalar joylashgan kuchli guruhdan nimchorak finalga chiqdi.
Avstriya terma jamoasi haqida hozircha ozgina ma’lumotga egamiz. Dastavval, futbolchilarimizga dam berishimiz kerak. Ular tiklanib olganlaridan keyin kelasi o‘yinga tayyorgarlik ko‘ramiz”, — deydi Ravshan Haydarov.
Izoh (0)