AQShda o‘quvchilar 72 mingta qo‘ng‘izni maktabga qo‘yib yubordi

AQShda o‘quvchilar maktab binosiga 72 ming xonqizi qo‘ng‘izini qo‘yib yubordi. Bu ishning ba’zi qatnashchilari jinoiy javobgarlikka tortilishi mumkin, deb xabar qiladi “Nur.kz”.

Hodisa 20-may kuni erta tongda sodir bo‘ldi. Besh kishi Merilend shtatidagi maktab eshigini buzib kirib, binoga 72 ming xonqizi qo‘ng‘izini qo‘yib yuborgan. Yana ikki nafar bola ko‘chada mashina ichida sheriklarini kutib turgan.

AQSh politsiyasi maktab ma’muriyati bilan hazillashmoqchi bo‘lgan 7 nafar o‘quvchini ushladi. Ulardan 6 nafari yuqori sinf o‘quvchilari, yana biri esa yaqinda maktabni bitirgan o‘quvchi ekan.

Hazilkashlardan 4 nafari voyaga yetmaganligi uchun ularga nisbatan ma’muriy jazo qo‘llaniladi. Qolgan uch kishi jinoiy javobgarlikka tortilishi mumkin.

Surishtiruv davomida buncha katta miqdordagi qo‘ng‘izlar Amazon internet-do‘konidan sotib olingani aniqlandi. Ammo o‘n minglab xonqizi qo‘ng‘izlarining keyingi taqdiri nima bo‘lishiga oydinlik kiritilmadi.

Maktab o‘quvchilari hazilkashlarning oldini olib, ularga nisbatan jazo qo‘llanilishiga qarshi chiqdi.