O‘zbekiston hukumati “Yaponiya xalqaro hamkorlik banki va Yaponiya tijorat banklari ishtirokida O‘zbekiston Respublikasi yerusti raqamli teleuzatish tarmoqlarini rivojlantirish investitsiya loyihasini amalga oshirish chora-tadbirlari to‘g‘risida” qaror qabul qildi, deb xabar bermoqda UzDaily.
Qarorga ko‘ra, ushbu loyiha bo‘yicha o‘tkazilgan tanlov yakunida “O‘zimpeksaloqa” MChJ va Yaponiyaning Ogawa Seiki Co. Ltd kompaniyasi o‘rtasida “Radioaloqa, radiouzatuv va televideniye markazi” davlat unitar korxonasi uchun umumiy qiymati 8 751 343 200 iyena (73,63 million dollar) bo‘lgan raqamli televideniye uskunalarini yetkazib berish bo‘yicha shartnoma tuzilgan.
Loyiha Yaponiya xalqaro taraqqiyot banki tomonidan Sumitomo Mitsui Banking Corporation tijorat banki bilan konsorsiumda moliyalashtiriladi. 2015-yil yanvar oyida O‘zbekiston Tashqi iqtisodiy faoliyat milliy banki shartnomani birga moliyalashtirish bo‘yicha zayom kelishuvini imzolagan. 12 yilga, jumladan ikki yilga imtiyoz bilan taqdim etiladigan kredit miqdori 62,59 million dollardir. “Aloqabank” aksiyadorlik kompaniyasi esa 11,04 million dollar miqdoridagi kreditni besh yil muddatga milliy valyutada taqdim etadi.
Izoh (0)