Inter Tashkent Expo kompaniyasi to‘y marosimlari haqidagi “To‘ylar muborak” jurnali bilan hamkorlikda 2015-yil 30-may kuni soat 19.00 da Lotte City Hotel Tashkent Palace mehmonxonasida “To‘ylar muborak” festivalini tashkillashtiradi. Bu haqda kompaniya matbuot xizmati xabar bermoqda.
“To‘ylar muborak” O‘zbekistondagi to‘y tantanalari va nikoh marosimlari haqida o‘zbek tilida hikoya qiluvchi birinchi serjilo jurnal hisoblanadi. “To‘ylar muborak” jurnali hozirda o‘z faoliyatini kengaytirib, yangidan-yangi va turfa xil yirik loyihalarni amalga oshirib kelmoqda.
Mazkur tadbirni o‘tkazishdan ko‘zlangan maqsad milliy qadriyatlarimizni saqlash hamda taraqqiy toptirish, o‘zbek xalqining noyob va bebaho ma’naviy dunyosi, madaniy merosi, an’analari va marosimlarini namoyon qilish va yuksaltirishdan iborat.
Loyiha bir qator yetakchi to‘y liboslari salonlarining dizaynerlari tomonidan taqdim qilinadigan kelin ko‘ylaklar va milliy liboslar defilesi, estrada yulduzlari ishtirokidagi musiqiy shou-dastur hamda mehmondo‘st xalqimizning sharqona uslubdagi dasturxonini o‘z ichiga oladi. Bundan tashqari, mehmonlar tadbir doirasida o‘zbekning eng yaxshi an’analariga xos turli tomoshalarga ham guvoh bo‘ladi.
Tadbirga diplomatik korpus va xalqaro tashkilotlar vakillari, to‘y sanoatining yetakchi namoyondalari, shou-biznes yulduzlari taklif qilinadi. Batafsil ma’lumot uchun +99890 902 92 96 telefon raqamiga qo‘ng‘iroq qilish mumkin.
Izoh (0)