Ulug‘bek Muhammadiyev yangi ombudsman etib saylandi

Toshkent shahrida 2015-yil 15-may kuni O‘zbekiston Respublikasi Oliy Majlisi Senatining ikkinchi yalpi majlisi ochildi, deya xabar bermoqda O‘zA.

Avval xabar berganimizdek, unda senatorlar qator qonunlarni ma’qulladi.

Bundan tashqari, senatorlar Ulug‘bek Muhammadiyevni O‘zbekiston Respublikasi Oliy Majlisi Inson huquqlari bo‘yicha vakili (Ombudsman) etib saylash to‘g‘risidagi masalani ham ko‘rib chiqdi. Mazkur masala yuzasidan tegishli qaror qabul qilindi.

“Gazeta.uz” yozishicha, Ulug‘bek Muhammadiyev (1971-yilda tug‘ilgan) Oliy Majlis Qonunchilik palatasining Xalqaro masalalar va parlamentlararo aloqalar bo‘yicha qo‘mitasi raisi hisoblanadi.

Bungacha ombudsmanlikni Sayyora Rashidova bajarib kelgan, u bu lavozimga 1995-yil dekabrida saylanib, ketma-ket to‘rt marta besh yillik muddatda ishlagan.