2011-yil aprel oyida Toshkent viloyati Parkent tuman hokimiyati ruxsati bilan tashkil qilingan mas’uliyati cheklangan jamiyat turli korxona va tashkilotlarga kompyuter hamda maishiy texnika vositalarini yetkazib berishi kerak edi, deb xabar beradi “Huquq” gazetasi.
Biroq MChJ rahbari nafsiga erk berib, 2012-yil mart oyida tumandagi xususiy korxona bilan imzolangan 20 milion so‘mlik shartnomani bajarmadi. Unga ko‘ra, MChJ korxonaga 10 ta kompyuter va maishiy texnika vositalarini yetkazib berishi kerak edi. Biroq rahbar pul hisob raqamiga o‘tkazib berilgach, jamiyat bosh hisobchisi bilan jinoiy til biriktirib, hujjatlarni soxtalashtirdi.
Bundan tashqari, jamiyat rahbari tumandagi 17-maktabgacha ta’lim muassasasi bilan 1 million 880 ming, Yuqori Chirchiq tumanidagi qishloq vrachlik punkti bilan 2 million 420 ming so‘mlik shartnomalar tuzdi. Biroq shartnoma talablari bajarilmay, kelishilgan pul rahbar ehtiyojlari uchun xizmat qildi.
Olib borilgan tergov-surishtiruv harakatlari natijasida jamiyat rahbari va bosh hisobchining boshqa qilmishlari ham fosh etildi. MChJ 2011-2014-yillarda davlat soliq idorasiga soxta hisobotlari topshirgani va buning natijasida byudjetga 43 million 705 ming so‘m pul qasddan to‘lanmagani aniqlandi.
Qonunbuzarlarga, sud hukmiga muvofiq, tegishli jazo tayinlandi.
Izoh (0)