O‘zbekistonda maktab bitiruvchilarining akademik litsey va kasb-hunar kollejlariga kirish tartibiga muvofiq, o‘quvchilar hujjatlari kollej va litseylar ma’muriyatiga ota-onalar tomonidan emas, sinf rahbarlari tomonidan yetkazib beriladi. Bu haqda “7x7” gazetasi xabar bermoqda.
Shaxsiy hujjatlar umumta’lim maktablari bitiruvchilarining o‘qishni davom ettirishga oid arizalarga muvofiq ravishda tayyorlanadi. Sinf rahbarlari bitiruvchilarning hujjatlarini kollej va litsey maslahat markazlariga topshiradi. Shaxsiy hujjatlar o‘quvchi yoki uning ota-onasiga berilmaydi. Bitiruvchining hujjati o‘quv muassasalariga maktab vakili tomonidan yetkazib beriladi.
Agar qaysidir kollej yoki litseyga o‘qishga kirish uchun bitiruvchilardan belgilangan miqdordan ziyod ariza kelib tushsa, mazkur o‘quv dargohida Davlat test markazi tomonidan kirish imtihonlari o‘tkaziladi. Boshqa holatlarda bunday imtihonlar o‘tkazilmaydi. Bitiruvchilar o‘z arizalariga binoan tegishli kollej yoki litseyga taqsimlanadi. Bitiruvchi imtihondan o‘tolmasa, shaxsiy hujjatlarida o‘quvchi xohishiga binoan zaxira sifatida qayd etilgan ta’lim dargohiga yuboriladi. Har qanday holatda ham sinf rahbarlari o‘z o‘quvchilarining kollej yoki litseyga joylashishini nazorat qilib boradi.
Izoh (0)