Olim Arifov: Bu yoshda FIFA komissari bo‘lish – fantastika

O‘zbekistonliklar orasida FIFA va OFK bayrog‘i ostidagi turli musobaqalarda hakamlik yoki assistenlik qilayotganlar yetarli. Ammo komissar hamda nazoratchilar borasida bunday fikr bildirolmaymiz, deb yozadi “Uff.uz”.

Nazoratchilardan birgina Farhod Abdullayevni tilga olsak, komissarlar 2 nafar − O‘FF matbuot xizmati boshlig‘i Sanjar Rizayev va federatsiya texnik bo‘limi rahbari Olim Arifov. E’tiborlisi, 28 yoshli Arifov OFKning eng yosh komissari hisoblanadi. Quvonarlisi, u yaqinda FIFA komissarlari ro‘yxatiga ham kiritildi. Demak, shu paytgacha OFK miqyosidagi musobaqalarda rasmiy shaxs sifatida ishlab kelgan Arifov endilikda FIFA tasarrufiga kiruvchi turnirlar, jumladan, JCh−2018 saralash bahslarida ham komissarlik qiladi. Shu munosabat bilan “Uff.uz” yosh mutaxassisdan qisqacha intervyu oldi.

— Olim, avvalambor, FIFA komissari maqomini olganingiz bilan tabriklaymiz. Bu xabarni birinchi bo‘lib kim va qachon yetkazdi?

— Tabrik uchun rahmat. Men Janubiy Koreyada edim. Kechqurun mehmonxonada ishlab o‘tirsam, internet orqali OFKdan shunday xabar keldi. Ochig‘i, avvaliga bunga ishonmadim, xuddi tushdek tuyuldi. Beixtiyor kimdir aprel hazili qilyapti, chog‘i, deb o‘yladim. Ertasiga esa ertalabdan tabriklarni qabul qila boshladim. OFK va FIFAda ishlayotgan hamkasb do‘stlarim, tanishlarim tabriklashdi. Shundan keyingina bu ma’lumotning yolg‘on emasligiga ishonch hosil qildim.

— Demak, bu siz uchun kutilmagan holat bo‘ldi...

— Albatta. Bu yoshda FIFA komissari maqomini olish shaxsan men uchun olamshumul yangilik. Ha, FIFA komissari bo‘lishni orzu qilardim, lekin o‘z maqsadimga bu darajada tez yetishishni xayolimga ham keltirmagandim. OFK komissari sifatidagi faoliyatim 2011 yili boshlandi. Shu qisqa vaqt oralig‘ida OFK bayrog‘i ostidagi qit’a musobaqalarda ishladim. Jumladan, klublar o‘rtasida OFK kubogi hamda OChL, shuningdek, terma jamoalar miqyosida umumiy hisobda 60taga yaqin uchrashuvda komissarlik qildim. Qisqasi, bir so‘z bilan aytganda, bu men uchun 2015 yilning eng yaxshi yangiligi yanglig‘ yangradi.

— Sizni FIFAning eng yosh komissari sifatida ham tabriklasak bo‘ladimi?

— Bu masalada tayinli javob berishga qiynalaman. Sababi, FIFA komissarlarining ro‘yxati rasman e’lon qilinmaydi. Ammo har qanday holatda g‘oyat xursandman va o‘zimni FIFAning eng yosh komissarlaridan biri, deb bilaman. Bu yoshda FIFA komissari bo‘lish - shunchaki, fantastika! Mana, 4 yil ichida OFK komissari maqomidan FIFA komissari darajasiga ko‘tarildim. Agar bu yil FIFA komissarlari safidan joy olmaganimda, buni yana 4 yil kutishimga to‘g‘ri kelardi. Chunki FIFA komissarlar ro‘yxatiga har 4 yilda bir marta o‘zgartirish kiritadi. Kimdir ushbu ro‘yxatdan chiqariladi, boshqa birov tarkibga kiritiladi. O‘zim uchun tarixiy voqelik aynan shu yil amalga oshganidan benihoya xursandman.

— Komissarlik bilan parallel ravishda O‘FF texnik bo‘limi boshlig‘i lavozimida ham faoliyat yurityapsiz. Ushbu bo‘limning ishi qanday davom etyapti?

— Vazirlar Mahkamasining 214-sonli qarori ijrosini ta’minlash bo‘yicha belgilangan reja asosida ish olib boryapmiz. Bu qarorda barcha sport turlari, xususan, futbolda ham murabbiylik faoliyatini yanada takomillashtirish chora-tadbirlariga alohida urg‘u qaratilgan. Qaror ijrosini ta’minlash maqsadida yosh murabbiylarni imtihondan o‘tkazib kelyapmiz. Ular ko‘rsatayotgan natijalar asosida ko‘proq nimalarga e’tibor qaratishimiz kerakligini aniqlab olyapmiz. OFK va FIFA tomonidan poytaxtimizda muntazam ravishda tashkil etib kelinayotgan PRO guvohnomasi uchun o‘quv-kurslarini ham o‘tkazishga yordam beryapmiz. Bizda murabbiylarni o‘qitish tizimi yaxshi yo‘lga qo‘yilgan. PRO litsenziyasi uchun o‘quv jarayoni yuqori saviyada tashkil etiladi.

Murabbiylarga xorijlik ko‘zga ko‘ringan instruktorlar saboq berishdi. Aytaylik, germaniyalik Erik Rotmyuller va angliyalik Gari Fillipsni alohida qayd etib o‘tishim kerak. Erik Germaniya milliy jamoasi murabbiylar shtabida 10 yil ishlagan. Boy tajribaga ega mutaxassis. 1996 yili Yevropa chempioni ham bo‘lgan. Gari esa Angliya o‘smir va yoshlar terma jamoalarida jismoniy tayyorgarlik bo‘yicha murabbiy rolini bajargan. “Borussiya”ning hozirgi bosh murabbiyi Yurgen Klopp ham vaqtida Erik Rotmyuller qo‘l ostida PRO guvohnomasi uchun o‘qigan va imtihon topshirgan ekan. Shunga qarab xulosa chiqarsak, Toshkentda PRO uchun o‘tkazilayotgan o‘quv-kurslari saviya bo‘yicha chakki emas.

— Fikringizga qo‘shilaman, lekin natija biz uchun unchalik yaxshi bo‘lmayapti. PRO litsenziyasi ega bir qator murabbiylarimiz bugungi kunda ishsiz yurishibdi. Buni raqobat bilan bog‘lash kerakmi yoki boshqa sabablari ham bor?

— Haqiqatan ham, oliy toifali murabbiylarimizning ayrimlari ishsiz yurishibdi. Bizda xorijdagi kabi klublar ko‘p emas. Mana, bu yildan oliy liga klublari soni 16taga yetkazildi. PRO guvohnomasiga ega murabbiylarimiz esa 60 nafardan ko‘p. Umuman, bu muammo faqat bizda emas, butun dunyoda bor. Murabbiylar soni hamisha klublardan ko‘p bo‘ladi. Qolaversa, PRO litsenziyasiga ega mutaxassislarimiz yaxshi joyda, kamida oliy liga klublarida ishlashni istash­yapti. «Oliy guvohnomam bo‘la turib, 1-ligada ishlaymanmi?» qabilida o‘ylaydigan murabbiylar ham yo‘q emas. Agarda ular masalaga boshqacha yondashganlarida nafaqat o‘zlari, balki 1-liga saviya­si oshishi uchun ham yaxshi bo‘lardi.