Fransiyada Van Gog va Gogenning birga tushgan ilk surati topildi

Fransiyada, taxminlarga ko‘ra Vinsent Van Gog, Pol Gogen va Emil Bernar tasvirlangan fotosurat topildi. L’Express’ning xabar berishicha, ushbu suratni kolleksioner ayoldan qabul qilib olgan fransiyalik mutaxassis Serj Plantyuro shunday xulosaga kelgan.

Suratda olti kishi tasvirlangan. Ekspert ulardan biri Pol Gogen ekanligini aniqlagan. Rassom o‘ziga xos keng va qopga o‘xshash bretoncha shimda, boshida esa Gogen o‘zining ko‘plab avtoportretlarida chizgan qalpoq bor.

Fotosuratga o‘tirib tushgan boshqa bir odamni Plantyuro Van Gogga juda ham o‘xshatyapti. Biroq, fotosuratdagi qiyofa Van Gogning ko‘pchilikka tanish yuziga nisbatan kengroq. Mutaxassisning fikricha, Van Gogning asosan avtoportretlar orqali tanish uchburchak chehrasi u kasallangan tishlarini juda erta olib tashlagani bilan izohlanadi – keyinchalik u yangi tishlar qo‘ydirgan va bu uning chehrasini birmuncha o‘zgartirgan.

Plantyuroning fikricha, surat taxminan 1887 yili, ya’ni, Van Gog ham, Gogen ham turli badiiy tajribalar o‘tkazayotgan vaqtda olingan.

Ayni vaqtda, Gollandiyaning DutchNews.nl nashri xabariga ko‘ra, Van Gog muzeyi xodimlari suratda aynan u tasvirlanganini shubha ostiga olishmoqda. Ularning so‘zlariga ko‘ra, Van Gog suratga tushishni yomon ko‘rgan va har safar suratga tushishni rad etgan. Bundan tashqari, mutaxassislarning fikricha, suratdagi odam mashhur rassomga o‘xshamaydi.

O‘lchami 88ga 119 millimetr bo‘lgan surat iyun oyida Bryusseldagi auksionda sotiladi. Surat 120-150 ming yevroga baholanmoqda.

Bungacha Van Gogning o‘smirlik davrida olingan faqatgina ikkita fotosurati saqlab qolingan deb hisoblanardi.