Nepaldagi zilzila qurbonlari soni 5,6 mingdan oshdi

Nepaldagi zilzila oqibatida qurbon bo‘lganlar soni 5,6 ming kishidan oshib ketdi, deb xabar beradi “RIA Novosti”.

Nepal politsiyasi ma’lumotiga ko‘ra, 5630 kishi halok bo‘lgan, tan jarohati olganlar soni 7879 kishiga yetgan. Nepal poytaxti Katmanduning o‘zida 1089 kishi hayotdan ko‘z yumgan.

7,9 magnitudali yer silkinishi 25-aprel kuni Nepalda sodir bo‘ldi. Epitsentri mamlakat poytaxtidan 82 kilometr uzoqlikda bo‘lgan zilziladan keyin bir nechta aftershoklar kuzatildi. Takroriy zilzilalarning eng kuchlisi 6,7 magnituda bo‘ldi.

Eslatib o‘tamiz, Nepal hukumati zilzila oqibatida halok bo‘lganlar xotirasiga 3 kunlik motam e’lon qildi.

Avvalroq Rossiya samolyotlari Nepaldan o‘zbekistonliklarni ham evakuatsiya qilganini xabar bergandik.