O‘zbekistonlik uch nafar tennischi Chimkent turnirining 2-davrasiga yo‘l oldi

Qozog‘istonning Chimkent shahrida tennis bo‘yicha sovrin jamg‘armasi 10 ming AQSh dollaridan iborat bo‘lgan Shymkent Open turniri davom etmoqda. Unda O‘zbekistondan bir guruh iste’dodli tennischilar o‘z imkoniyatlarini sinovdan o‘tkazyapti, deb xabar beradi Olamsport.com.

Turnirda uchinchi raqam ostida tasniflangan Vlada Yakshibarova ilk davrada rossiyalik Irina Lidkovskayani 6:3, 6:4 hisobida taslim etdi. Yettinchi raqam ostida harakat qilayotgan Albina Xabibulina esa belaruslik Polina Pexovadan 6:4, 1:6, 6:0 hisobida ustun keldi. Yana bir O‘zbekiston vakilasi Polina Merenkova qozog‘istonlik Darya Shevchenkoni 6:1, 6:0 hisobida mag‘lubiyatga uchratdi.

Oltinchi raqamli tennischi bo‘lgan o‘zbekistonlik Arina Fols saralash bahslari g‘olibalaridan biri rossiyalik Aleksandra Dubrovinaga 7:6, 3:6, 4:6 hisobida imkoniyatni boy berdi. Shuningdek, O‘zbekiston tennischilaridan Go‘zal Yusupova va Yuliya Kim ham o‘z ishtirokini yakunladi.