Yaqin kelajakda O‘zbekison Boshqirdiston Respublikasida savdo uyini ochishni rejalashtirmoqda. Bu haqda O‘zbekistonning Rossiyadagi Favqulodda va Muxtor Elchisi Akmal Kamolov Boshqirdiston rahbari Rustem Xamitov bilan uchrashuv vaqtida ma’lum qildi, deb xabar beradi UzDaily.
Rustem Xamitov Boshqirdiston Respublikasi O‘zbekiston korxonalari bilan hamkorlik qilishdan manfaatdor ekanligini aytib o‘tdi.
“Sizning mahsulotlaringiz bizda katta hajmda paydo bo‘lishi va bizning mahsulotlarimiz ham O‘zbekiston Respublikasida taqdim etilishi uchun barcha ishni qilamiz. Afsuski, so‘nggi yilda O‘zbekiston va bizning respublikamiz o‘rtasidagi tovar aylanmasi deyarli ikki barobarga kamayib ketdi. Bu sizning yoqilg‘i hamda turli kimyoviy mahsulotlarni kamroq olishni boshlaganingiz bilan bog‘liq. Biz ikkala tomonning tovar aylanmasi o‘sishi uchun harakat qilamiz”, — dedi Boshqirdiston rahbari.
2014-yil yakunlariga ko‘ra, Boshqirdiston va O‘zbekiston o‘rtasidagi tovar aylanmasi 127,2 million dollarni tashkil qildi. Bundan 71,6 million dollar eksport, 55,5 million dollar esa import hissasiga to‘g‘ri keladi.
Ayni vaqtda Boshqirdiston hududida O‘zbekiston kapitali ishtirokida ochilgan 78 ta korxona faoliyat olib bormoqda.
Izoh (0)