Saudiya Arabistonida o‘quv-mashg‘ulot vaqtida samolyotning yerga qulashi natijasida mamlakat harbiy havo kuchlarining ikki uchuvchisi halok bo‘ldi, deb xabar qiladi “RBK”.
“Qirol Faysal nomidagi harbiy havo kuchlari akademiyasining o‘quv-mashg‘ulot samolyoti avariyaga uchradi. Samolyot yerga quladi, instruktor va uchuvchi-kursant halok bo‘ldi”, — deyiladi mudofaa vazirligi bayonotida.
Ayni vaqtda samolyot turi va avariyaning sabablari ma’lum emas.
21-aprel kuni Saudiya Arabistoni rahbarligidagi koalitsiya Yamanda olib borilgan “Jasorat bo‘roni” operatsiyasi yakunlanganini e’lon qilgandi. Ushbu operatsiya davomida Yamandagi qo‘zg‘olonchilarga aviazarbalar berildi.
Oldinroq Saudiya shahzodasi Alvalid bin Talal qirollikning Yamanga aviahujumlarda ishtirok etgan har bir uchuvchisiga bittadan yangi Bentley sovg‘a qilishga va’da bergandi.
Saudiya Arabistoni rahbarlari koalitsiya yangi “Umidning tiklanishi” operatsiyasini boshlash arafasida ekanligini ma’lum qildi. Operatsiya Yamandagi nizolarning siyosiy yechimiga, xavfsizlik va terrorizmga qarshi kurashga qaratiladi. Uning asosiy vazifasi Yamanning tiklanishi va xusiylarni yo‘q qilish bo‘ladi.
Izoh (0)