Rossiya Bosh shtabi AQShning dunyodagi 100 ta mamlakatga qo‘shin yuborish rejasini fosh qildi

Rossiya Bosh shtabi razvedka bosh boshqarmasi boshlig‘i general-polkovnik Igor Sergun AQSh o‘z qo‘shinlarini doimiy yoki vaqtinchalik asosda dunyoning yuzdan ortiq mamlakatiga joylashtirmoqchi ekanligini ma’lum qildi, deb yozadi Meduza.

Ushbu mamlakatlarda, general so‘zlariga ko‘ra, “janglar bo‘layotgan hududlardagi harbiy harakatlarni ta’minlash uchun zarur bo‘lgan qurol-yarog‘ va harbiy texnikani oldindan zaxira qilib qo‘yish uchun obyektlar qurish ko‘zda tutilmoqda”.

Rossiya Bosh shtabi tezkor bosh boshqarmasi boshlig‘i general-leytenant Andrey Kartapolov, o‘z navbatida, AQSh hozirgi kundagi “barcha harbiy nizolarning buyurtmachisi” ekanligini ta’kidladi.

G‘arbiy harbiy okrug qo‘shinlari qo‘mondoni general-polkovnik Anatoliy Sidorov AQShni Rossiyaga qarshi gibrid urush olib borishda aybladi.

Bunday bayonotlar bilan generallar Ikkinchi Jahon urushidagi g‘alabaning 70 yilligiga bag‘ishlangan harbiy-ilmiy anjumanda chiqish qildi.