Ukraina prezidenti Pyotr Poroshenko Rossiya prezidenti Vladimir Putinga nisbatan g‘alamislik qilmaganini ma’lum qildi. Bu haqda u Fransiyaning iTele telekanaliga bergan intervyusida aytib o‘tdi, deya xabar bermoqda “Segodnya.ua”.
“Men Putinga nisbatan g‘alamislik qilmaganman, men – siyosiy jihatdan yetarlicha mas’uliyat his qiladigan insonman”, - dedi Poroshenko.
Ayni vaqtda, uning qo‘shimcha qilishicha, u Rossiyadan ko‘ra Fransiya bilan qo‘shni bo‘lishni ma’qul ko‘rgan bo‘lardi. “Biz qo‘shnilarni tanlay olmaymiz... Xuddi Fransiyadek qo‘shnimiz bo‘lishini istardik, biroq bizga Rossiya qo‘shni”, - dedi Ukraina prezidenti.
Poroshenkoning qayd etishicha, Donbassda tinchlik sulhiga rioya etilmayapti. “O‘t ochishni to‘xtatish tartibiga amal qilinyaptimi? Yo‘q, qon to‘kilishi davom etmoqda”, - dedi Poroshenko.
Ukraina prezidentining so‘zlariga ko‘ra, xalqaro kelishuvlar tizimi amal qilishdan to‘xtagan. Bundan tashqari, Poroshenko o‘z intervyusida Ukrainada mamlakatning NATOga qo‘shilishi masalasida referendum o‘tkazilishini ham ma’lum qildi.
Izoh (0)