Hindistonlik ziyoratchilarni olib ketayotgan avtobus Nepaldagi daraga qulashi oqibatida 12 kishi halok bo‘ldi, 27 kishi tan jarohati oldi. Bu haqda “RIA Novosti” xabar berdi.
Hindistonning Gujarat shtatidan kelgan 45 ziyoratchini olib ketayotgan avtobus 100 metr balandlikdagi tog‘ yo‘lidan daraga qulagan. Ziyoratchilar Katmandudagi Pashupatitantx ibodatxonasidagi ziyoratdan so‘ng Hindistonga qaytayotgan edi.
Hodisa joyida qutqaruv ishlari olib borilmoqda, unda mahalliy aholi va xavfsizlik xizmati xodimlari ishtirok etmoqda. Jarohatlangan yo‘lovchilar Katmandudagi kasalxonaga yetkazilgan, ulardan olti nafarining ahvoli juda og‘ir ekanligi aytilmoqda.
Avtobus daraga tiqilib qolgan, taxminlarga ko‘ra, aksariyat yo‘lovchilar avtobus ostida, chiqolmay turgan bo‘lishi mumkin.
Pashupatinatx ibodatxona majmuasi Bagmati daryosi qirg‘oqlarida joylashgan bo‘lib, hinduiylarning Shiva xudosi manifestatsiyalaridan biri – jonivorlar homiysi Pashupatinatxga bag‘ishlangan. Ibodatxona V asrda qurilgan bo‘lib, har yili unga minglab sayyohlar va, asosan, Hindistondan keladigan ziyoratchilar tashrif buyurishadi.
Izoh (0)