O‘zbekistonning AQSh bilan oliy ta’lim tizimidagi hamkorlik aloqalari muhokama qilindi

16-aprel kuni O‘zbekiston respublikasi Oliy va o‘rta maxsus ta’lim vazirligida AQShning O‘zbekistondagi Favqulodda va muxtor elchisi Pamela Spratlen bilan uchrashuv bo‘lib o‘tdi, deya xabar bermoqda vazirlik matbuot xizmati.

Muzokaralar chog‘ida oliy ta’lim tizimida hamkorlik aloqalarining istiqbollari, shu jumladan ta’lim muassasalalarining bevosita aloqalarini rivojlantirish masalalari muhokama etildi. Shuni ta’kidlash joizki, hozirda respublikamizning bir qator Oliy ta’lim muassasalari AQShning nufuzli universitetlari bilan turli sohalar bo‘yicha hamkorlik qilib keladi. Ular safida Vashington shtati universiteti, Pittsburg universiteti, Michigan universiteti, Jon Xopkins universiteti, Illinoys va Kentuki universitetlari kabi o‘nlab universitetlarni kiritish mumkin.

O‘zbekiston – Amerika universitetlarining hamkorligi o‘quv jarayonini takomillashtirish, zamonaviy pedagogik va axborot texnologiyalarini joriy etish, hamda fundamental ilmiy tadqiqotlar kabi qator yo‘nalishlarini qamrab oladi. Suhbat chog‘ida Pamela Spratlen, O‘zbekiston oliy ta’lim tizimi Markaziy Osiyo hududidagi ilg‘or tizimlardan biri ekanligini alohida ta’kidlab o‘tdi.

Shuningdek, AQSh professor o‘qituvchilari ham Fulbrayt singari dasturlar doirasida O‘zbekistondagi Oliy ta’lim muassasalarida talabalarga ingliz tilidan saboq berib kelishadi. O‘qituvchilarning tajriba almashuv tizimlari nafaqat tilshunoslik yo‘nalishi balki matematika, texnik fanlar va muhandislik ixtisosliklarini ham qamrab oladi. Spratlen xonim AQSh elchixonasining kichik grantlar loyihasi haqida ham ma’lumot berib o‘tdi. Bu dastur AQShda malaka oshirgan mutaxassislarning chekka hududlarda ingliz tili saboqlarini berishini rag‘batlantirishga xizmat qiladi.

Hozirda O‘zbekiston va Amerikaninng oliy ta’lim yo‘nalishidagi kelgusida amalga oshiriladigan ishlari mujassamlashtirilgan hamkorlik rejasi ishlab chiqilgan bo‘lib, u uch yo‘nalishda amalga oshiriladi.

Bular:

- ingliz tillini o‘rganish va o‘qitish bo‘yicha hamkorlik;

- ilm-fan va texnologiyalarni rivojlantirish;

- universitetlararo hamkorlik.

Tomonlar AQSh va O‘zbekistonning oliy ta’lim yo‘nalishidagi hamkorligi ingliz tilshunosligi bilan bir qatorda texnik va muhandislik yo‘nalishlari, shu jumladan Innovatsion texnologiyalar, muqobil energiya manbalaridan foydalanish, geologiya va tog‘-kon ishi, tibbiyot kabi qator yonalishlarda olib borilishini alohida qayd etishdi.