Laqqa baliq qornidan Gitler maxfiy xizmatining ofitseri qoldiqlari topilgani haqidagi xabar yolg‘on bo‘lib chiqdi

20-aprel kuni Rossiyaning qator OAVlari Oder daryosidan tutilgan ulkan laqqa baliq ichidan inson suyaklari va Ikkinchi jahon urushi davriga tegishli metall belgi topilgani haqida parodiyalar sayti tomonidan tarqatilgan xabarni chop etdi, deb xabar bermoqda “Tjournal.ru”.

Qoldiqlar go‘yoki Germaniya tomonidan Polsha bosib olingan davrda halok bo‘lgan SS maxfiy xizmati ofitseriga tegishli ekanligi taxmin qilingan. Ushbu yangilik “Zvezda”, “Ridus”, “Komsomolskaya Pravda” singari saytlarda chop etilgan. “RIA Novosti”dan esa tezda o‘chirib tashlangan.

Yangilik manbasi hazil va yolg‘on xabarlarga ixtisoslashgan World News Daily Report bo‘lgan. Avvalroq aynan ushbu sayt Merilin Monroning qotili haqida xabar tarqatgan edi.