17-aprel kuni Butunjahon boks seriyasi (WSB) 5-mavsum 13-turida “Ukraina atamanlari” Kiyevda Rossiya jamoasini qabul qildi, deya xabar bermoqda “Sports.uz”.
Bellashuvlarda Ukraina jamoasi 3:2 hisobida zafar quchib, birinchi davradagi mag‘lubiyat revanshini olishga erishdi.
49 kilogrammgacha bo‘lgan vazn toifasida “atamanlar” safidagi o‘zbekistonlik bokschi Hasanboy Do‘smatov raqibi Belik Galanovga birorta raundni boy bermadi va ishonchli g‘alabaga erishdi.
56 kilogrammgacha vaznda Olimpiya litsenziyasi uchun asosiy da’vogarlardan sanalgan Vladimir Nikitin Ukraina klubining qirg‘izistonlik legioneri Omurbek Malabekovni mag‘lub etib, jamoasiga ochko olib kelishga erishdi.
Vladimir Matviychuk (-64 kg) ham mehmonlar vakili Grigoriy Lizunenko bilan kechgan bellashuvda o‘z mahoratini namoyish etib, raqibiga imkoniyat qoldirmadi.
75 kilogrammgacha vaznda Xurshid Normatov Pyotr Xamukov bilan kuch sinashib, mavsumdagi ilk mag‘lubiyatini qabul qilib oldi.
Ukraina chempioni Gevorg Manukyan (-91 kg) Sergey Kalchuginga qarshi ringga ko‘tarilib, butun bahs davomida to‘liq ustunlik qildi va yakunda jamoasining umumiy hisobdagi g‘alabasini ta’minladi.
Izoh (0)