Xitoyning Eron neft sanoatiga kiritgan investitsiyalari hajmi 20 milliard yevroga yetdi va bundan keyin yana uch barobarga o‘sishi mumkin. Bu haqda Eron neft vaziri o‘rinbosari Muqaddam Shoiriy ma’lum qildi, deya xabar bermoqda “TASS”.
Muqaddamning so‘zlariga ko‘ra, Xitoy hozirgi vaqtda Erondan neft xomashyosini sotib olayotgan eng yirik xaridor bo‘lib, uni sotishdan tushgan pul Eronning Xitoy banklaridagi hisob-raqamlarida qolmoqda.
Uning qayd etishicha, Eron neft sanoatiga kiritiladigan sarmoya miqdorini bir necha bor oshirish haqidagi qaror Pekin tomonidan yaqin vaqt ichida qabul qilinadi.
Hozirgi vaqtda Xitoy neft qazuvchi kompaniyalari Eron janubi-g‘arbidagi Huziston viloyatida zaxirasi 30 milliard barrelga baholangan Yadovaron koni ustida ishlamoqda. Loyihaning birinchi bosqichida sutkasiga 75 ming barrel neft qazib olinadi. Xitoyning Sinopec kompaniyasi loyihaga 2 milliard dollar miqdorida sarmoya kiritgan.
O‘z navbatida, CNPC kompaniyasi Shimoliy Ozodagondagi kuniga 120 ming barrel neft qazib olish imkonini beradigan konni o‘zlashtirish uchun 2 milliard dollar investitsiya kiritgan.
Milliy yadroviy dasturi sabab Eronga nisbatan AQSH va Yevropa Ittifoqi tomonidan joriy etilgan sanksiyalarga muvofiq, Erondan neft sotib olish, shuningdek, mamlakat neft sanoatiga investitsiya kiritish taqiqlangan. Hozirgi vaqtda Eron nefti asosan Xitoy, Hindiston va bir qator Osiyo mamlakatlari tomonidan sotib olinmoqda.
Izoh (0)