Britaniyalik g‘avvoslar qiymati 34 million funt-sterlingga teng kumush tangalar xazinasini topishdi

Deep Ocean Search guruhi g‘avvoslari 2013-yil sentabrida qiymati 34 million funt-sterlingga teng bo‘lgan kumush tangalar xazinasini topib, suvdan olib chiqishgan. Meduza.io’ning xabar berishicha, oradan qariyb ikki yil o‘tib, Britaniya transport vazirligi City of Cairo paroxodidan olib chiqilgan xazina haqidagi axborotni oshkor etishga ruxsat berdi.

Bombeydan Buyuk Britaniya tomon suzib ketayotgan City of Cairo kemasi 1942-yili nemis suvosti kemasi tomonidan cho‘ktirib yuborilgan. Bortida 100 tonna tanga bo‘lgan kema Muqaddas Yelena oroli yaqinida, 5150 metr chuqurlikka cho‘kib ketgan. Deep Ocean Search kema bo‘laklarini izlashga kirishmagunicha, City of Cairo 2011-yilga qadar bedarak yo‘qolgan deb gumon qilib kelinardi.

Xabar berishlaricha, City of Cairo’dan topilgan tangalar qayta eritilib, sotilgan – olingan daromad esa Buyuk Britaniya moliya vazirligi va g‘avvoslar o‘rtasida taqsimlangan.

Ma’lumot uchun, City of Cairo paroxodi 1915-yili qurilgan bo‘lib, 1942-yil 6-noyabrida nemislarning U-68 suvosti kemasidan otilgan torpedo tegib, cho‘kib ketgan. City of Cairo bortida 311 kishi bo‘lgan, ularning 104 nafari halok bo‘lgan.