Taekvondo bo‘yicha Osiyo chempionatida O‘zbekiston terma jamoasi yana 4 ta medalni qo‘lga kiritdi

Xitoy Taypeyida taekvondo WTF bo‘yicha o‘smirlar, yoshlar hamda parataekvondo bo‘yicha Osiyo chempionati davom etmoqda, deb xabar berdi “Olamsport”.

Kadetlar o‘rtasida o‘tkazilgan musobaqada yoshlarimiz yana 4 ta medalga ega bo‘lishdi. -41 kg vazn toifasida dayanga chiqqan hamyurtimiz Madina Mannopova kumush medal bilan taqdirlandi. Aynan shu vaznda ishtirok etgan vakilimiz Bekzod Ibragimov, shuningdek, -33 kg vaznda Jasurbek Zokirov hamda -45 kilo vaznda Abdulla Shomurodov bronza medaliga sazovor bo‘lishdi.

Eslatib o‘tamiz, Osiyo chempionatining o‘smirlar o‘rtasidagi bahslarida hamyurtlarimizdan 68 kg vazn toifasida dayanga chiqqan Nigora Tursunqulova kumush, 63 kg vazn toifasida ishtirok etgan Pan Vlada, 73 kg vazndagi Shahboz Shofayziyev hamda 78 kg vaznda yurtimiz sport sharafini himoya qilgan Sayidolim Nu’monov bronza medaliga sazovor bo‘lishgan edi. Demak, hozircha terma jamoamiz hisobida 2 ta kumush, 7 ta bronza medali bor.