Avtobusi o‘qqa tutilgan “Fenerbaxche” Turkiya chempionati to‘xtatilishini so‘ramoqda

Turkiyaning “Fenerbaxche” klubi avtobusi o‘qqa tutilgani munosabati bilan klub o‘z avtobusiga qilingan qurolli hujumning barcha sabablari aniqlanmagunicha milliy chempionatning to‘xtatilib turilishini so‘ramoqda, deb yozadi “Stadion.uz”.

“Qurolli hujumning barcha sabablari aniqlanmagunicha, milliy chempionat o‘yinlarini to‘xtatib turish kerak, deb hisoblaymiz. Qon to‘kilgan joyda futbol tugaydi. Aybdorlarni topib, jazolash ‘Fenerbaxche’ uchun juda muhim”, — deyiladi klub bayonotida.

Turkiya chempionatining bir nechta klubi “Fenerbaxche” taklifini qo‘llab-quvvatladi.

Eslatib o‘tamiz, Istanbulning “Fenerbaxche” klubi Turkiya chempionati doirasida “Rizespor” jamoasi ustidan 5:1 hisobida g‘alabaga erishgan edi. Uchrashuvdan so‘ng klub avtobusiga qurolli hujum uyushtirilgan. Riza shahridan Trabzon tomon ketayotgan avtobus tomon o‘qotar quroldan o‘t ochilgan. Xabar qilinishicha, bu vaqtda avtobus katta tezlikda harakatlanayotgan bo‘lgan. Hujum natijasida avtobus haydovchisi yaralangan. Shunga qaramay, u boshqaruvni qo‘ldan chiqarmagan va jiddiy avtohalokatdan saqlanishga muvaffaq bo‘lgan.