Buyuk Britaniyaning Daily Mail nashrida 135 yoshida vafot etgan qoraqalpog‘istonlik onaxon To‘ti Yusupova sayyoramizning eng keksa insoni bo‘lgani yoki bo‘lmagani masalasi yoritildi.
Nashrning yozishicha, To‘ti Yusupovaning yaqinlari uning tug‘ilganlik to‘g‘risidagi guvohnomasi va pasporti 1880-yil 1-iyulda tug‘ilganiga dalil bo‘lishini aytmoqda. Ular Ginnesning rekordlar kitobi ushbu ko‘rsatkichni qayd etishini istamoqda. Hozirda rekordlar kitobida ushbu natija 1997-yilda 122 yoshida vafot etgan fransiyalik Janna Kalmanga tegishli deb yozilgan.
To‘ti Yusupovaning ta’ziya marosimida qatnashgan Qoraqalpog‘iston Vazirlar kengashi rahbari Bahodir Yangiboyev 30 milliondan ortiq aholisi bo‘lgan O‘zbekistonda 8700 dan ko‘proq 100 yoshdan oshgan keksalar borligi dunyodagi eng sog‘lom joylardan ekanligiga dalolatligini ta’kidlab, To‘ti Yusupovaning yoshi to‘g‘risidagi ma’lumot Ginnesning rekordlar kitobi rasmiylariga topshirilishi lozimligini ma’lum qilgan.
Nashr 135 yoshli onaxon yaqindagina “To‘ti Yusupova − uch asr guvohi” nomli hujjatli film qahramoni bo‘lganini ham qayd etgan. Filmda To‘ti momo uzoq umrning siri halol yashashda ekanligini ta’kidlagan edi.
Izoh (0)