Yaponiya amal qilish muddati 13-aprelda tugaydigan, KXDRga qarshi bir tomonlama sanksiyalarni ikki yilga uzaytirdi, deya xabar bermoqda “TASS”.
Sanksiyalar Pxenyan bilan savdoning taqiqlanishini o‘z ichiga oladi, shuningdek Shimoliya Koreya kemalarining Yaponiya portlariga kirishini cheklaydi.
Muddatni uzaytirish bo‘yicha qaror Yaponiya fuqarolari o‘g‘irlab ketilishini tergov qilishda progress yo‘qligi sababli qabul qilindi.
O‘tgan yilning iyulida Shimoliy Koreya 1970—80-yillarda o‘g‘irlab ketilib, KXDRda kuch bilan saqlanayotgan yaponiyaliklar taqdirini tergov qilsa, Yaponiya sanksiyalarning bir qismini bekor qilishga va’da bergan edi.
Tokioning ta’kidlashicha, 1970-yillarda KXDR maxsus xizmatlari Yaponiyadan 17 fuqaroni o‘g‘irlab ketgan. KXDR esa ularning soni 13 ta ekanini aytmoqda. Garovdagilarning besh nafari muzokaralar natijasida o‘z vataniga qaytgan, qolgan sakkiz kishi, KXDR ta’kidlashicha, vafot etgan. Biroq Yaponiya buni yolg‘on ma’lumot deb hisoblab, ularning ishi qaytadan tergov qilinishini talab qilgan edi.
Izoh (0)