1-aprel — Hazil kuni munosabati bilan Google o‘z servislarida turli hazilomuz aksiyalarni ishga tushirdi, deya xabar bermoqda “Lifehacker.ru”.
Chunonchi, manzil satriga com.google’ni terish orqali oddiy Google qidiruv sahifasining aksi tasvirlangan sahifaga tushib qolasiz. Bu yerda barchasi aksincha, hattoki matn kiritish va qidiruv natijalarining chiqishi ham.
Google Maps’da esa klassik Pac-man o‘yinini o‘ynash mumkin, bunda darajalar rolini shahringiz xaritasi bajaradi.
Google’ning Yaponiyadagi bo‘linmasi yangi Google Now servisiga ega Google Panda yumshoq o‘yinchog‘ini chiqara boshladi. Yaponiyadagi Google bu bilan ham cheklanib qolmasdan, yangi gadjet — barmoqlar yordamisiz matn terish mumkin bo‘lgan klaviaturani chiqarish haqida e’lon qildi.
Bundan tashqari, Chrome mobil brauzerida yangi #Chromeselfie tugmasi paydo bo‘ldi, u kamerani ishga tushirib, ayni paytda brauzerda ochiq bo‘lgan sayt fonida selfi olib, u bilan bo‘lishish imkonini beradi.
Shuningdek, Google yangi Smartbox pochta qutisi namoyish etilgan videoni ham chiqardi. U avtomatik ravishda spam va keraksiz pochta bilan kurashadi, hamda pochtachi yangi xat keltirganida sizni xabardor qiladi.
Izoh (0)