Baxtiyor Ashurmatov boshchiligidagi O‘zbekiston U-23 terma jamoasi Yoshlar o‘rtasidagi Osiyo chempionati saralashidan o‘rin olgan guruhdagi so‘nggi o‘yinni Suriya U-23 termasiga qarshi o‘tkazdi, deb xabar bermoqda “Uff.uz”.
O‘yinni vakillarimiz juda sust boshlashdi. Futbolchilarda maydonda to‘p surish uchun ishtiyoq va xohish yo‘qdek ko‘rindi. Yoshlarimizning harakatini boshqacha ta’riflab ham bo‘lmaydi. Suriya esa juda ishonchli tarzda harakat qilib, ketma-ket hujumlar bilan himoyachilarimiz ko‘zini ochirmay qo‘yishdi. Vakillarimiz esa ha deganda o‘zlariga kela olishmadi.
Suriyaliklarning hujumlari o‘z samarasini bermay qolmadi. Bungacha ham bir nechta qulay imkoniyatlarga ega bo‘lgan Umar Harbin 29-daqiqada osonlik bilan gol kiritib, hisobni ochdi. Bu vaziyatda darvozabonimizni ayblab bo‘lmaydi. Aksincha, jarima maydonchamiz ichida harakatsiz qotib qolgan 5 nafar (!) himoyachilar golda bor ayblarini o‘zlariga olishlari kerak.
Goldan keyin ham Ashurmatov shogirdlari vaziyatni o‘nglash uchun harakat qilishmadi yoki qilishni xohlashmadi. Natijada Suriya birinchi bo‘lim yakuniga qadar yana ko‘plab xavfli vaziyatlar yaratdi. Bizda ham vaziyatlar bo‘ldi, ammo bu vaziyatlarni yaqqol golli vaziyat deb atashga uyaladi kishi.
Birinchi bo‘lim oxirlarida Sardor Rahmonov raqibni jarima maydonchasi ichida yiqitib, darvozamizga penalti olib keldi. Penaltidan yana o‘sha Umar Harbin unumli foydalanib, hisobni 2:0 ko‘rinishiga olib keldi.
Ikkinchi bo‘limda ham vaziyat deyarlik shunday davom etdi. Suriyaliklar ketma-ket hujum qilishdi, o‘zbekistonliklar bu hujumni amallab qaytarib turishdi. Faqatgina 59-daqiqaga kelib vakillarimiz hisobni qisqartirishga muvaffaq bo‘lishdi.
Shundan so‘ng o‘yin oxiriga qadar darvozalarga boshqa gol kiritilmadi. Shu tariqa Ashurmatov shogirdlari guruhdagi so‘nggi o‘yinda mag‘lubiyatga uchrab, Osiyo chempionatiga yo‘l olish masalasini katta so‘roq ostida qoldirishdi.
Ma’lumot uchun, guruhda 1-o‘rinni qo‘lga kiritgan jamoalar to‘g‘ridan-to‘g‘ri yo‘llanmaga ega bo‘lishsa, yana 5 ta yaxshi ko‘rsatkichga ega bo‘lgan 2-o‘rin sohiblari OChda o‘ynash huquqini qo‘lga kiritishadi. Boshqa guruhlardagi o‘yinlar bir oz kechroq bo‘lib o‘tishi tufayli, hozircha Olimpiyachilarimizning taqdiri noma’lumligicha qolyapti.
Suriya U-23 − O‘zbekiston U-23 2:1
Gollar: Umar Harbin (29, 45+1) - A.Maxstaliyev (59)
O‘zbekiston U-23: Akmal Tursunboyev, Akromjon Komilov, Sardor Rahmonov, Boburbek Yo‘ldoshev, Vladimir Kozak, Abdulloh Olimov, Jamshid Iskanderov, Hasan Asqarov, Diyor Turopov, Abbosbek Maxstaliyev, Igor Sergeyev.
Suriya U-23: Abdullatif Nassan, Muayyad al-Ajjan, Omir al-Midaniy, Ahmad Ashkar, Umar Harbin, Mahmud al-Mavas, Hamid Mido, Mahmud al-Bahiyr, Amro Junayt, Muayyad al-Xavliy, Yusuf Xalfah.
Izoh (0)