“Toshkent shahridagi 158-saylov uchastkasidagi ovoz berish jarayoni bilan tanishdim. Uchastkalar demokratik tamoyillarga mos jihozlangani, saylovchilar ushbu muhim siyosiy tadbirda faol ishtirok etayotganiga guvoh bo‘ldim, — deya Kenichi Matsumoto, Yaponiya tibbiyot uskunalari sohasida tashqi texnik ko‘mak tashkiloti (OMETA) prezidenti, “Matsumoto” jamg‘armasi raisi so‘zlarini keltirmoqda O‘zA. — Aytish joizki, demokratiyaning barcha davlatlarda bir xil joriy etilishi lozim bo‘lgan universal modeli yo‘q. Har bir tizim muayyan xalqning manfaati, madaniyati, an’ana va urf-odatlari, mamlakatning jo‘g‘rofiy-tarixiy sharoitini hisobga olgan holda joriy etilsa yuksak samara beradi.
O‘zbekistonda amalga oshirilayotgan demokratik islohotlar, jumladan, saylov tizimi xalqaro andozalar va demokratik davlatlarning ilg‘or tajribasi, xalqning an’anaviy qadriyat va qarashlarini mujassamlashtirgani bilan ham diqqatga sazovordir. Menimcha, saylovlar huddi O‘zbekistondagidek erkin, adolatli, ochiq va oshkora, tartibli va osoyishta o‘tishi lozim. Zero, tinchlik va osoyishtalik taraqqiyot va farovonlikning asosi hisoblanadi.
Bugungi kunda O‘zbekistonda jismonan chiniqqan va ma’nan yetuk avlodni kamol toptirishga ulkan e’tibor qaratilayotgani barchaga ma’lum. Yoshlarning intellektual salohiyatini yuksaltirish, ularni xorijiy tillarni o‘rganishga jalb qilish, o‘z iqtidorini to‘la namoyon etishi uchun barcha sharoitni yaratish barobarida yoshlar orasida sport turlarini ommalashtirish borasida amalga oshirilayotgan keng ko‘lamli ishlar ham tahsinga loyiq. O‘zbekistonda ertangi kunning hal qiluvchi kuchi bo‘lgan yoshlarning barkamolligi yo‘lida olib borilayotgan sa’y-harakatlarni yuksak baholayman”.
Izoh (0)