Nemis aviatsiya uyushmasi BDL Germaniya aviakompaniyalarining reyslariga yangi qoidalarni kiritish rejasi haqida ma’lum qildi, deb xabar bermoqda “Gazeta.ru”.
Yangi qoidaga binoan, uchuvchi kabinasida bir vaqtning o‘zida kamida ikki nafar ekipaj a’zosi bo‘lishi lozim. Bunga o‘xshagan qoida avvalroq Norwegian kompaniyasi tomonidan qabul qilingan.
Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.
Tekshiruvlar natijasida Airbus A320 samolyotining ikkinchi uchuvchisi ataylab havo kemasi komandiriga kabina eshigini ochmagani ma’lum bo‘lgan edi. “Qora quti”dan olingan yozuvda uchuvchi qaytadan kabinaga kirmoqchi bo‘lgani, biroq buni uddalay olmaganini eshitish mumkin. Uchuvchi dastlab eshikni sekin taqillatgan, so‘ng qattiqroq urgan, shundan keyin esa eshikni urib sindirmoqchi bo‘lgan, biroq uddalay olmagan. Oxir-oqibat u kabinaga kira olmagan.
Izoh (0)