Markaziy saylov komissiyasining kengaytirilgan onlayn majlisi bo‘lib o‘tib, unda O‘zbekiston Respublikasi Prezidenti saylovini o‘tkazuvchi okrug saylov komissiyalari raislari va a’zolari, xalqaro tashkilotlar va xorijiy davlatlardan kuzatuvchilar, siyosiy partiyalar va ommaviy axborot vositalari vakillari ishtirok etdi. Bu haqda O‘zbekiston Respublikasi Prezidenti saylovini yoritish bo‘yicha Respublika matbuot markazi xabar bermoqda.
Majlisda O‘zbekiston Respublikasi Prezidentligiga nomzodlarning saylovoldi tashviqoti monitoringi masalalari, shuningdek, O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturini amalga oshirish doirasidagi vazifalar ko‘rib chiqildi.
Qayd etilganidek, saylov qonunchiligiga muvofiq O‘zbekiston Respublikasi Prezidentligiga nomzodlarga, siyosiy partiyalarga saylovoldi tashviqotini olib borishda, shu jumladan, ommaviy axborot vositalari imkoniyatlaridan foydalanishda teng sharoit ta’minlanmoqda. Joriy yilning 14-fevralidan O‘zbekiston Respublikasi Prezidentligiga nomzodlar O‘zbekiston ijtimoiy-siyosiy, ijtimoiy-iqtisodiy rivojlanishining turli masalalari bo‘yicha o‘z qarashlari aks etgan saylovoldi dasturlari qoidalarini saylovchilarga va keng jamoatchilikka yetkazishga yo‘naltirilgan saylovoldi tashviqotini o‘tkazmoqda.
O‘zbekiston Respublikasi Prezidentligiga nomzodlar va ularning ishonchli vakillari barcha saylov okruglarida saylovchilar bilan uchrashuvlar o‘tkazmoqda, ommaviy axborot vositalarida Markaziy saylov komissiyasi tomonidan qur’a tashlash yo‘li bilan belgilangan tartibda chiqish qilmoqda: O‘zbekiston Xalq demokratik partiyasi, O‘zbekiston “Milliy tiklanish” demokratik partiyasi, Tadbirkorlar va ishbilarmonlar harakati — O‘zbekiston Liberal-demokratik partiyasi va O‘zbekiston “Adolat” sotsial-demokratik partiyasi. O‘zbekiston Respublikasi Prezidentligiga nomzodlar ommaviy axborot vositalaridagi saylovoldi tashviqoti materiallarining turi, shakli, uslubi va mazmunini mustaqil belgilaydi.
Har bir nomzod va siyosiy partiya tomonidan markaziy “O‘zbekiston” va “Yoshlar” tele- va radiotelekanallarida ajratilgan 900 daqiqadan, hududiy tele- va radiokanallarda ajratilgan 180 daqiqadan efir vaqtidan samarali foydalanmoqda. Shuningdek, “Xalq so‘zi”, “Narodnoye slovo” va “Pravda vostoka” gazetalari va hududiy gazetalar sahifalarida ham tashviqot materiallari chop etilmoqda. Ularda tegishincha har bir nomzodga 10 va 5 sahifadan nashr maydoni ajratilgan. O‘zbekiston Respublikasi Prezidentligiga nomzodlar partiyalarning bosma nashrlari sahifalarida ham o‘z saylovoldi kampaniyasini olib bormoqda, Internet nashrlar imkoniyatlaridan foydalanmoqda.
Saylovoldi tashviqotida tashqi (ko‘cha) reklama deb nomlangan vositalardan ham samarali foydalanmoqda. Xususan, butun O‘zbekiston bo‘ylab O‘zbekiston Respublikasi Prezidentligiga nomzodlarning 829 tadan banneri joylashtirilgan. Bundan tashqari, nomzodlarning elektron roliklari respublikadagi elektron monitorlarda har kuni tizimli ravishda namoyish etilmoqda. Ta’kidlanganidek, saylovoldi tashviqotining o‘tgan davrida saylov qonunchiligi buzilishi hollari qayd etilmadi.
Majlisda Markaziy saylov komissiyasi a’zolari saylov kuni — 29-mart kuni ovoz berishga tayyorgarlik ko‘rish va uni o‘tkazish masalalarini ko‘rib chiqdi. Bunda milliy saylov qonunchiligi talablariga, ochiqlik, oshkoralik va adolatlilik tamoyillariga rioya etish zarurligi qayd etildi.
O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturini amalga oshirish doirasida barcha bo‘g‘indagi saylov komissiyalari tomonidan fuqarolarning saylov huquqlarini ta’minlashga qaratilgan katta ish olib borildi.
O‘zbekiston Respublikasi Prezidenti saylovini o‘tkazish uchun 9060 ta saylov uchastkasi, shu jumladan, O‘zbekiston Respublikasining xorijiy davlatlardagi vakolatxonalari huzurida 44 ta saylov uchastkasi tuzildi. Ular ovoz berishni o‘tkazish uchun barcha zarur jihozlar bilan ta’minlangan. Har bir saylov uchastkasida O‘zbekiston Respublikasi Prezidentligiga nomzodlar haqida axborot mavjud. Uchastka saylov komissiyalari tomonidan saylovchilarni ovoz berish vaqti va joyi haqida xabardor qilish bo‘yicha ishlar olib borildi. O‘zbekiston davlat va nodavlat telekanallarida saylov sanasi haqida informatsion tele- va radio roliklar, muddatidan oldin ovoz berish, saylov kuni ovoz berish tartibi, saylov byulleteni, shuningdek, uchastka saylov komissiyalarining saylov kungi ishi haqida ko‘rsatuvlar hamda videoroliklar namoyish etilmoqda.
Hozirgi kunda saylov kuni o‘z yashash manzilida bo‘lish imkoniyati bo‘lmagan saylovchilar uchun muddatidan ovoz berish jarayoni davom etmoqda.
O‘zbekiston Respublikasi Prezidenti saylovi kampaniyasini yoritishda Markaziy saylov komissiyasi tomonidan akkreditatsiyadan o‘tkazilgan 430 nafar, joylarda okrug saylov komissiyalari tomonidan akkreditatsiyadan o‘tkazilgan 550 nafarga yaqin O‘zbekiston va xorijiy ommaviy axborot vositalari vakillari ishtirok etmoqda. Ularni barcha zarur axborot materiallari bilan ta’minlash maqsadida O‘zbekiston Respublikasi Prezidenti saylovini yoritish bo‘yicha Respublika matbuot markazi, okrug saylov komissiyalari huzurida ham xuddi shunday matbuot markazlari faoliyat yuritmoqda. Ularda matbuot anjumanlari, brifinglar va seminarlar o‘tkazilmoqda.
Saylov jarayonining ochiqligi va oshkoraligini oshirish maqsadida respublikada internetga ulangan yagona kompyuter tarmog‘i yaratilgan bo‘lib, u ovoz berish jarayonini onlayn rejimida kuzatish va mamlakatimiz hududlari bilan videoadloqa o‘rnatishga yordam beradi. Markaziy saylov komissiyasi saylov kuni jamoatchilikni ovoz berishning borishi haqida 29-mart kuni soat 13.00, 17.00 va 22.00 da Respublika matbuot markazida bo‘lib o‘tadigan brifinglar orqali xabardor qiladi.
Markaziy saylov komissiyasining kengaytirilgan majlisida okrug saylov komissiyalari a’zolari saylovni tashkil qilish va o‘tkazish bilan bog‘liq bo‘lgan barcha amaliy masalalar bo‘yicha batafsil axborot oldi.
Izoh (0)