Alisher Navoiy nomidagi O‘zbekiston Milliy kutubxonasida Sharq san’atining turli yo‘nalishlariga bag‘ishlangan kitoblar ko‘rgazmasi bo‘lib o‘tmoqda, deb xabar berdi “Turkiston-Press” nodavlat axborot agentligi.
Kolleksiyadan rassomlik, me’morchilik, amaliy va boshqa Sharq san’ati turlariga bag‘ishlangan kitob va albomlar o‘rin olgan. 31-martgacha davom etadigan ko‘rgazmada o‘zbek, rus, fransuz, nemis, ingliz, amerikalik sharqshunoslar, tarixchilar, san’atshunoslar, etnograflar va sayohatchilarning ilmiy-tadqiqot va tarixiy kitoblari namoyish etiladi.
Foydalanuvchilar kitoblardan tashqari miniatyurachi rassomlarning asarlari va ularga berilgan izohlar bilan tanishishlari mumkin. Toshkent ganch o‘ymakorligi maktabi, hind haykaltaroshlik maktabi, yapon rassomchilik maktabi, Eron, Turkiya va Xiva gilamdo‘zlik maktablari haqidagi kitoblar alohida ahamiyatga ega.
O‘zbekiston Milliy kutubxonasi fondidan taqdim etilgan kitoblar XIX asr boshi va XX asr o‘rtalarida chop etilgan bo‘lib, ularning eng yoshi kattasi 1821-yilda chiqarilgan.
Izoh (0)