Kreml Dnepropetrovsk viloyati gubernatori Igor Kolomoyskiy iste’fosi haqidagi xabar izoh talab etadi, deb o‘ylamaydi. Bu haqda Rossiya prezidenti matbuot kotibi Dmitriy Peskovga tayanib, “RBK” xabar berdi.
Nashrning eslatishicha, Putin avvalroq Kolomoyskiy shaxsi haqida o‘z fikrini bildirgan edi. 2014-yil martida bo‘lib o‘tgan matbuot anjumanida u Kolomoyskiyni tovlamachi deb atab, uning rossiyalik oligarx Abramovichni “chuv tushirib” ketganini eslatgan edi.
25-mart kuni avvalroq Ukraina prezidenti Pyotr Poroshenko Dnepropetrovsk viloyati gubernatori Igor Kolomoyskiyni iste’foga chiqarish haqida buyruq imzolagani xabar berilgan edi.
Dnepropetrovsk viloyati gubernatori vazifasini bajaruvchi etib Valentin Reznichenko tayinlandi, u bir oy avval Zaporojsk viloyati gubernatoriga aylangan edi.
Igor Kolomoyskiy Ukrainaning eng boy tadbirkorlaridan biri hisoblanadi. U Dnepropetrovsk viloyatini 2014-yil martidan buyon boshqargan.
Izoh (0)