Rossiya prezidenti Vladimir Putin muxolifatchi Boris Nemsovning o‘ldirilganini eshitib, “qattiq g‘azablandi”, deya xabar bermoqda Bloomberg o‘z manbalariga tayanib, deb yozadi “Korrespondent.net”.
“Shu bilan birga, prezident tergovning qotillikka chechenlar aralashgani haqidagi xabaridan yanada ko‘proq tashvishga tushdi”, — deb yozadi agentlik yana boshqa manbasiga tayanib.
Checheniston rahbari Ramzan Qodirov hodisadan ko‘p o‘tmay, Instagram’ida Nemsovning qotilligida G‘arb maxsus xizmatlari aybdorligini yozgan edi.
“Qotillik tashkilotchilari Nemsovning o‘limida butun dunyo mamlakat rahbariyatini ayblashiga, natijada norozilik yuzaga kelishiga umid qilgan, — dedi Qodirov. — Nemsovning o‘limini Rossiyada har qanday yo‘l bilan ichki nizoni keltirib chiqarishga urinayotgan G‘arb maxsus xizmatlari tashkil qilganiga shubha yo‘q”.
Checheniston rahbari fikricha, Kiyev bilan munosabatlar keskinligini hisobga olgan holda, Nemsovga nisbatan “hukm”ni Ukraina maxsus xizmatlari qo‘li bilan ijro etgan bo‘lishlari mumkin.
7-mart kuni Rossiyalik siyosatchi Boris Nemsovning o‘ldirilishida gumon qilinayotgan Anzor Gubashev va Zaur Dadayev Federal xavfsizlik xizmati va IIV jinoyat qidiruv bosh boshqarmasining qo‘shma operatsiyasi chog‘ida Moskva tashqarisida qo‘lga olingan edi.
Eslatib o‘tamiz, Boris Nemsov Moskva vaqti bilan 27-fevral 23:15 da (Toshkent vaqti bilan 28-fevral 01:15 da) Moskva markazidagi Moskvoretskiy ko‘prigida otib o‘ldirildi.
Ichki ishlar vazirligi rasmiy vakili so‘zlariga ko‘ra, Nemsov qiz do‘sti bilan ko‘prikdan o‘tayotgan mahal oq rangli mashinadan unga qarata oltita o‘q otilgan. Shulardan to‘rttasi muxolifatchiga kelib tekkan. Qotillik chog‘ida siyosatchining yonida bo‘lgan qiz — 23 yoshli ukrainalik model Anna Duritskaya o‘z ko‘rsatmalarini berib, vataniga qaytib ketdi.
Izoh (0)