Rossiya tashqi ishlar vaziri Sergey Lavrov Reuters agentligining Donetsk yonidagi “Boing” halokati guvohlarini topgani haqidagi xabarini uydirma deb atadi. Bu haqda Meduza xabar berdi.
“Qandaydir guvohlar bir-birlariga zid bo‘lgan, har qanday mutaxassis uchun kulgili gaplarni so‘zlab berdi”, — dedi Lavrov.
Vazir G‘arb OAVlarini “Boing” halokati chog‘ida osmonda bo‘lgan Ukraina harbiy samolyoti haqida aytayotgan guvohlarning so‘zlariga e’tibor qaratmaslikda aybladi.
“Ukraina harbiy aerodromlaridan birida ishlagan bir guvoh bor, u o‘sha kuni topshiriq bilan uchib ketgan harbiy samolyot bitta raketasiz qaytib kelganini ma’lum qilgan edi”, — dedi u.
Eslatib o‘tamiz, Donetsk viloyatidagi Chervoniy Jovten qishlog‘i aholisi Reuters agentligiga 2014-yil 17-iyulda yo‘lovchi “Boing”ini urib tushirgan raketani ko‘rgani haqida gapirib bergan edi.
Reuters ta’kidlashicha, Fedotov kameraga raketa ukrainalik harbiylar tomonidan nazorat qilingan hududdan uchirilganini aytgan, biroq kamera o‘chirilgach, uning ayirmachilar hududidan uchirilganini tan olgan. Uning aytishicha, qishloq xo‘jalik ishchilari unga Chervoniy Jovten qishlog‘idan bir yarim kilometr nariroqdagi ekin maydonida zenit batareyasi turganini ko‘rsatgan.
Yana bir nechta mahalliy aholi vakillari ham osmonda raketani va samolyotning portlaganini ko‘rganini gapirib bergandi.
Izoh (0)