Navro‘z nafasi kezib yurgan shu kunlarda Farg‘ona shahrida yangi qurib bitkazilgan markaziy “Istiqlol” stadioni foydalanishga topshirildi, deb xabar bermoqda O‘zA.
Davlatimiz rahbarining 2011-yil 15-noyabrdagi “2012-2015-yillarda Farg‘ona shahrining bosh rejasini amalga oshirish, ijtimoiy va transport-kommunal infratuzilmasi obyektlarini qurish va rekonstruksiya qilish chora-tadbirlari to‘g‘risida”gi qaroriga muvofiq Farg‘ona shahrida ulkan bunyodkorlik ishlari amalga oshirilmoqda.
Ushbu yo‘nalishdagi ishlarning izchil davomi sifatida yangidan bunyod etilgan 20 ming o‘rinli stadion o‘zining noyob me’moriy-muhandislik yechimi, betakror dizayni bilan shahar ko‘rkiga ko‘rk qo‘shmoqda.
“Istiqlol” stadioni xalqaro talablarga to‘la javob beradi. To‘rtta yoritish minorasi xuddi shaharning to‘rt tomonidan muxlislarni bu yerga chorlayotganday taassurot uyg‘otadi. Zamonaviy yoritish tizimlari o‘rnatilgani uning tunda ham xuddi kunduzgidek charog‘on bo‘lishini ta’minlaydi.
Tomoshabinlar joyi, maydon holati havas qilgulik darajada. Maydonga Gollandiyadan keltirilgan maxsus maysa urug‘i sepildi, natijada maydon to‘rt faslga ham chidamli, yil davomida ko‘m-ko‘k yashnab turadigan maysalar bilan qoplandi.
– Stadionda sportchilar, hakamlar, murabbiylar va ma’muriyat uchun alohida xonalar ajratilgan, – deydi stadion direktori I.Sobitov. – Anjumanlar zalida va futbol musobaqalarini tasvirga olish uchun ommaviy axborot vositalari xodimlariga ham qulay sharoitlar yaratilgan. 20 ming tomoshabinga mo‘ljallangan o‘rindiqlar, muhandislik ta’minoti talablariga ko‘ra, pastki va yuqori qavatlarga bo‘lingan.
Video tablo, zamonaviy audiosistema moslamalari va boshqa axborot-kommunikatsiya texnologiyalari bilan jihozlangan sharhlovchilar xonasi o‘yin paytida muxlislarni zarur ma’lumotlar bilan tezkor ravishda xabardor etish, musobaqalarni to‘g‘ridan-to‘g‘ri efirga uzatish, tele va radio translatsiya sifatini ta’minlashga xizmat qiladi.
– Stadionning Navro‘z bayrami arafasida foydalanishga topshirilishi viloyatimiz ahli uchun ajoyib tuhfa bo‘ldi, – deydi Farg‘ona viloyati futbol federatsiyasi birinchi vitse-prezidenti S.Zokirov. – Xalqaro andozalar darajasida barpo etilgan stadionda jahon miqyosidagi o‘yinlarga mezbonlik qilish imkoniyati yaratilgan. Ayni paytda viloyatimizda 4 professional va 24 havaskor futbol klubi, 14 futbol maktabi faoliyat ko‘rsatmoqda. Bunday imkoniyatlar ularni yanada ulkan marralar sari undaydi.
Ushbu muhtasham stadionning foydalanishga topshirilishi katta shodiyonaga ulanib ketdi. “Assalom, Navro‘zi olam!” deb nomlangan teatrlashtirilgan bayram dasturi namoyish etildi.
Tadbirda Farg‘ona viloyati hokimi Sh.G‘aniyev so‘zga chiqdi.
Izoh (0)