O‘zbekiston Respublikasi Vazirlar Mahkamasi Toshkent shahrining eski shahar qismida mavzelar bo‘yicha zamonaviy ko‘p qavatli uylar qurish (I bosqich) to‘g‘risida qaror chiqardi.
Ushbu qaror O‘zbekiston Respublikasi Prezidentining “2015-yilda Toshkent shahrining eski shahar qismida zamonaviy qulay turar-joy yaratish chora-tadbirlari to‘g‘risida”gi 2014-yil 20-noyabrdagi PQ-2265-sonli qarorining ijrosini ta’minlash, shuningdek, Toshkent shahrining bosh rejasini amalga oshirish, uning eski shahar qismida zamonaviy shaharsozlik talablari asosida qulay uy-joylar qurish hamda hududning me’moriy qiyofasini va ijtimoiy-madaniy holatini tubdan yaxshilash va aholi yashashi uchun qulay shart-sharoitlar yaratish maqsadida qabul qilindi.
Qarorga muvofiq, Toshkent shahar hokimligining:
shaharning eski shahar qismidagi Nurafshon ko‘chasida 5 ta besh qavatli eksperimental uy qurilishi “Ipoteka bank” ATIB va “O‘zsanoatqurilishbank” OATB tomonidan ajratiladigan kreditlar hisobiga moliyalashtirilishi;
obyektni moliyalashtirish uchun ajratiladigan kredit mablag‘lariga belgilangan tartibda garov sifatida davlatga tegishli ko‘chmas mulk obyektlarini qo‘yish to‘g‘risidagi takliflari ma’qullandi.
“Ipoteka bank” ATIB va “O‘zsanoatqurilishbank” OATB tomonlaridan bosh pudrat tashkilotlari — “Toshkent uy-joy qurilish” DUK, “Yevrostroy Plus” va “Dizayn-Taraqqiyot” XKga obyekt qurilishi uchun O‘zbekiston Respublikasi Markaziy bankining qayta moliyalashtirish stavkasidan ortiq bo‘lmagan miqdorda obyekt qiymatining 90 foizigacha kredit mablag‘lari ajratish tavsiya etildi.
Bunda, taqdim etilayotgan kreditlar mazkur obyektlarni barpo etish muddatiga ajratilib hamda Toshkent shahar hokimligi tomonidan yangi quriladigan turar-joy xonadonlariga ko‘chib kiradigan oilalarni aniq shakllangan ro‘yxatini, shuningdek barcha zaruriy hujjatlarni banklarga kiritilgandan so‘ng, uzoq muddatli ipoteka kreditlariga qayta rasmiylashtirishi inobatga olinadi.
Izoh (0)