17-mart, seshanba kuni Rossiya davlat dumasi Boris Nemsov xotirasiga sukut daqiqasini e’lon qilib o‘tirmadi, deya xabar bermoqda “TASS”. Yalpi majlisda kun tartibini muhokama qilish chog‘ida deputat Dmitriy Gudkov bunday taklif bilan chiqqan edi.
“Uning fikrlarini doim ham qo‘llab chiqishmagan bo‘lsa-da, uning xotirasiga besh daqiqalik sukut saqlash insoniylik bo‘lar edi, deb o‘ylayman”, — dedi u.
Gudkovning taklifi ovozga qo‘yilmadi. Palata spikeri Sergey Narishkin deputatlarga siyosatchi o‘ldirilgan kuni Nemsovning qarindoshlariga telegramma jo‘natib, butun palata nomidan hamdardlik izhor etganini ma’lum qildi.
Eslatib o‘tamiz, Boris Nemsov Moskva vaqti bilan 27-fevral 23:15 da (Toshkent vaqti bilan 28-fevral 01:15 da) Moskva markazidagi Moskvoretskiy ko‘prigida otib o‘ldirildi.
Ichki ishlar vazirligi rasmiy vakili so‘zlariga ko‘ra, Nemsov qiz do‘sti bilan ko‘prikdan o‘tayotgan mahal oq rangli mashinadan unga qarata oltita o‘q otilgan. Shulardan to‘rttasi muxolifatchiga kelib tekkan. Qotillik chog‘ida siyosatchining yonida bo‘lgan qiz — 23 yoshli ukrainalik model Anna Duritskaya o‘z ko‘rsatmalarini berib, vataniga qaytib ketdi.
1-mart kuni siyosatchi aksilinqiroz marshida ishtirok etishi kerak edi. Marsh talablari qatoridan Ukraina bilan urushni zudlik bilan to‘xtatish, muxolifatni televideniyega qo‘yish, byudjetni markazlashmagan tizimga o‘tkazish, harbiy xarajatlarni qisqartirish evaziga sog‘liqni saqlash va ta’limga sarf qilinadigan mablag‘ni oshirish kabilar o‘rin olgan edi.
Izoh (0)