Yangi mavsumni Janubiy Koreyaning eng kuchli klublaridan sanalgan “Ulsan Xyonde” safida boshlaydigan O‘zbekiston terma jamoasi a’zosi Server Jeparov klubi bilan key-liga startini kutmoqda, deb xabar beradi “Stadion.uz”.
“Ulsan” esa ertaga, 8-mart kuni o‘z uyida “FK Seul”ni qabul qiladi. Hozirda klubda Serverga juda iliq munosabatda bo‘lishmoqda. Hattoki jamoaning 40 yoshli bosh murabbiyi Yun Jong Xvan koreys matbuotiga tajribali Server Jeparov haqida “Mahoratli futbolchi. Shu bilan birga u rostgo‘y va ishonchli yigit”, — deya fikr bildirib o‘tgan.
Serverni mahalliy muxlislar “O‘zbekistonlik sehrgar”, deb atamoqda. Kecha Janubiy Koreyaning Footbaalist nashri muxbiri “Ulsan”ning mashg‘ulotlari tugagach o‘zbekistonlik futbolchidan qisqacha intervyu oldi.
Server: Key-ligada “Seul” va “Seongnam” kabi poytaxt va poytaxtga yaqin klublarda to‘p surganligim sabab Ulsan shahrini hali to‘liq bilmayman. Bu yerga kelganimga endigina bir oy bo‘ldi. Dengiz bo‘ylari go‘zal ekan. Katta supermarketlar ham ko‘p. Ertaga ayolim Mariya va farzandlarim Veronika, Mia, Raul ham bu yerga yetib keladi. Umuman olganda, bu yerdagi holatimdan mamnunman.
Savol: Ulsanga kelganingizga bir oy bo‘libdi. Bu yerga qanchalik moslashib oldingiz?
Javob: Hali 100 foiz moslasholganim yo‘q. Lekin jamoadagi muhit a’lo darajada. Kamchiliklarimizni o‘yinlar davomida to‘g‘rilab boramiz. “Seongnam”da birga o‘ynagan koreys futbolchilar ham borligi tufayli bu yerda o‘zimni erkin his qilyapman. “Seongnam”daligimda dam olish vaqtlari Seulga borardik. Bu yerning e’tiborli joylarini hali yaxshi bilmayman.
Savol: Bosh murabbiy Yun Jong Xvan haqida fikringiz qanday? U ham yaqin-yaqingacha futbolchi edi...
Javob: Futbolchi sifatidagi o‘yinlarini ko‘rmagan bo‘lsam ham mashg‘ulotlar jarayonida to‘p bilan ishlashi professional darajada. U o‘z fikrlari va ko‘rsatmalarini aniq tushuntira oladi. Maqsadi bor. U menga juda ishonmoqda va men o‘z o‘yinim bilan ishonchini oqlash niyatidaman.
Savol: Bizga ma’lum bo‘lishicha, sizga qishda boshqa davlatlar ligalaridan ham yaxshi takliflar tushgan. Yana key-ligani tanlashingiz sababi nima?
Javob: Men Koreyani yaxshi ko‘raman. Oilam ham bu yerda baxtiyor. Bu yerda to‘rt fasl unchalik sovuq emas. Taomlari ham yoqadi. Faqat achchiq taomlarini hisobga olmaganda, albatta. Bu yerning cho‘chqa go‘shti, o‘rdak go‘shti juda yoqadi. O‘g‘lim umuman go‘sht yemasdi. Koreyaga kelgach u ham go‘sht yeyishni boshladi. Bu yerda oilam uchun barcha narsa muhayyo. Buning ustiga key-liga Osiyodagi eng kuchli chempionat. Key-ligada haqiqiy kurash bo‘ladi. Bunday kuchli ligada o‘ynash menga yoqadi.
Savol: Futbolda yosh o‘tgan sari har tomonlama qiyinlashadi. Siz o‘zingizni qanday his qilyapsiz?
Javob: Hali futbolchilik davrim tugayapti, deb o‘ylamayman. Mana Andrea Pirlo va Xavi kabi futbolchilar shu yoshda ham yuqori saviyada o‘ynayapti. Futbol bu faqat yugurish degani emas — fikrlash deganidir. Futbolda tajriba muhim. Men yana uzoq va uzoq (shu joyiga Server qattiq urg‘u beradi) futbol o‘ynash niyatidaman. Jismoniy holatimga e’tiborliman. Key-ligada kamida 37 yoshimgacha to‘p surish maqsadim bor (kuladi).
Savol: Osiyo Kubogida O‘zbekiston va Janubiy Koreya to‘qnash keldi. Shu haqdagi fikrlaringiz.
Javob: O‘zbekiston g‘alaba qozona oladigan o‘yin bo‘ldi. Qo‘shimcha daqiqalarda himoyadagi xatolar evaziga mag‘lubiyatga uchraldi. Janubiy Koreya Osiyodagi eng kuchli jamoalardan biri. Angliya va Germaniyada to‘p suradigan futbolchilaringiz hal qiluvchi o‘ringa ega. Men ham O‘zbekiston terma jamoasi safida 2018-yilgi Jahon chempionatida qatnashishni istayman. Avvalo, saralash bosqichidan o‘tishimiz lozim.
Savol: Bu yil “Ulsan Xyonde” bilan maqsadingiz qanday?
Javob: Key-ligadagi har bir klubim safida bittadan sovrinni olganman. Bu yil “Ulsan” bilan ham key-liga chempionligi, ham Kubokni qo‘lga kiritishni istayman. Men futbolchiman. Futbol — mening hayotim. Doim sovrin yutish istagida yonaman. Bu yil maydonda jamoadoshlarimni samarali to‘p uzatishlarim bilan ta’minlash niyatidaman. Tabiiyki, gollar ham kiritish mening doimiy maqsadim.
Izoh (0)