O‘zbekistonda Korean Air samolyoti uchuvchisi ko‘ziga lazer nuri tushirilishi yuzasidan tergov olib borilmoqda

Joriy yilning 5-yanvar kuni Korean Air aviakompaniyasining Seul−Toshkent yo‘nalishidagi reysni amalga oshirayotgan samolyot uchuvchisining ko‘ziga yashil rangdagi nur tushirilgan, deb xabar bermoqda “12news.uz”. Ushbu holat yuzasidan tergov harakatlari olib borilmoqda.

Huquqni muhofaza qilish organlari vakillarining ma’lum qilishicha, o‘tgan yilda beshta lazer bezoriligi holati kuzatilgan. Jumladan, 2014-yil 25-dekabr kuni Farg‘ona−Moskva samolyotining uchuvchisi ko‘ziga lazer tayoqchasi yordamida nur tushirgan farg‘onalik shaxs ma’muriy javobgarlikka tortilgan.

O‘zbekiston hukumati 2013-yil 1-martdan respublika hududiga lazer tayoqchalarini olib kirish va sotishni taqiqlagan. Bu ushbu qurilmalarning noqonuniy savdosiga chek qo‘yish, shuningdek parvozlar xavfsizligini ta’minlash maqsadida qabul qilingan. Huquqni muhofaza qiluvchi organlar o‘tgan davr mobaynida bu boradagi 37 ta qoidabuzarlikni aniqlab, 1,5 mingdan ortiq lazer tayoqchalarini musodara qilgan.