O‘zbekiston avtomobil va daryo transporti agentligida “O‘zbekiston Respublikasi ichki suv yo‘llarida foydalanishda bo‘lgan kemalarni ro‘yxatga olish, kema reyestrini yuritish, xos raqamlarni va kema guvohnomasini berishning yangi tartibi” mavzusida matbuot anjumani o‘tkazildi. Bu haqda agentlikning rasmiy saytida xabar berildi.

Anjumanda Agentlikning Daryo kemachiligi registri va kemachilik inspeksiyasi bosh mutaxassisi Valijon Azizov O‘zbekiston daryo kemachiligi, ushbu sohani boshqarish hamda texnik nazorat qilish organlarining qisqacha tarixi; O‘zbekiston avtomobil va daryo transporti agentligi Daryo kemachiligi registri va kemachilik inspeksiyasining asosiy vazifalari va huquqlari; Respublika daryo flotining hozirgi ahvoli, Mustaqillik yillarida ushbu sohada amalga oshirilgan ishlar, o‘zgarishlar; kemalarga va suzish vositalariga kema guvohnomalari, klassifikatsiya guvohnomalari, suzishga yaroqlilik to‘g‘risidagi guvohnomalar hamda Registr qoidalarida nazarda tutilgan boshqa hujjatlarni berish, kemalarni tegishli texnik ko‘riklardan o‘tkazish tartibi hamda Agentlik tomonidan daryo transporti sohasida xavfsizlikni ta’minlash maqsadida qabul qilingan me’yoriy-huquqiy hujjatlar va ularga rioya etilishini nazorat qilish borasida bajarilayotgan ishlar to‘g‘risida jurnalistlarga batafsil ma’lumot berdi.

“Xorijdan, asosan, sayl qilishga, 8-35 nafar yo‘lovchi tashishga mo‘ljallangan o‘ziyurar kemalar, kanallar tubini chuqurlashtirish va tozalab turishga mo‘ljallangan zemsnaryadlar olib kelinayotgan bo‘lsa, keyingi yillarda respublikada mustaqil ravishda 400 tonna yuk ko‘tarish qobiliyatiga ega bo‘lgan o‘ziyurmas kemalar qurilmoqda, – dedi ma’ruzachi. – Bunday kemalardan bittasi 2013-yilda va bittasi 2014-yilda ‘Termiz daryo porti’ MChJ tomonidan qurilib, barcha sinovlardan muvaffaqiyatli o‘tdi, ularga tegishli klass berilib, kema hujjatlari rasmiylashtirilgach, foydalanishga ruxsat etildi”.